Գործարկվել է Արցախից (Լեռնային Ղարաբաղ) բռնի տեղահանված ուսուցիչների աջակցության հարթակը, որտեղ այս պահին հասանելի է ՀՀ մարզերի հանրակրթական դպրոցներում առկա 1422 ուսուցչի թափուր աշխատատեղ (այս պահին՝ արդեն 1394-խմբ.), հայտնում են ԿԳՄՍ նախարարությունից։
Հանրապետության բոլոր մարզերի դպրոցներում աշխատանքի անցնելիս ԼՂ-ից բռնի տեղահանված ուսուցիչները կստանան 30 տոկոս հավելավճար, իսկ որոշ մարզերի՝ Սյունիքի, Վայոց Ձորի հանրակրթական ուսհաստատություններում, Գեղարքունիքի մարզի Ճամբարակ և Վարդենիս համայնքներում, Տավուշի մարզի Նոյեմբերյան, Իջևան և Բերդ համայնքներում աշխատանքի անցնելու դեպքում 30 տոկոս հավելավճարից բացի կունենան նաև ամենամսյա 50 հազար դրամ լրավճար:
Ինչպե՞ս պետք է ՀՀ մարզեր ուսուցիչների գործուղման համակարգում գրանցվեն և հայտ ներկայացնեն Հայաստանում բնակվող ուսուցիչները՝ ներկայացված է ըստ քայլերի հաջորդականության.
Քայլ 1․ Համակարգի (https://kadrer.emis.am) գլխավոր էջում սեղմեք «Մուտք» կոճակը:
Կբացվի նոր էջ, որտեղ հնարավոր է իրականացնել գրանցումը։
Քայլ 2․ Գրանցման էջի «Արցախից տեղահանված ուսուցիչների գրանցում» դաշտում մուտքագրեք պահանջվող բոլոր տվյալներն ու սեղմեք «Գրանցում» կոճակը։
Բջջային հեռախոսահամարն անհրաժեշտ է մուտքագրել առանց +374 կոդի և առանց 0-ի։
Էկրանին կպատկերվի հաղորդագրություն այն մասին, որ գաղտնաբառ ստանալու համար անհրաժեշտ է ստուգել Ձեր էլեկտրոնային փոստի հասցեն: Սեղմեք OK կոճակը։
Բոլոր դաշտերը լրացնելուց հետո սեղմեք «Գրանցում» կոճակը։
Էկրանին կպատկերվի հաղորդագրություն այն մասին, որ գաղտնաբառը ստանալու համար անհրաժեշտ է մուտք գործել Ձեր էլ․ փոստի հասցե (Սեղմեք OK կոճակը)։
Քայլ 3․ Մուտք գործեք այն էլ․փոստ, որի հասցեն գրանցել եք համակարգում։ Մուտքային հաղորդագրությունների մեջ կտեսնեք Կրթական տեխնոլոգիաների ազգային կենտրոնից ստացված նամակը, որտեղ Ձեր գաղտնաբառն է։ (Նամակը չգտնելու դեպքում այն փնտրեք նաև spam դաշտում)
Քայլ 4․ Համակարգի գլխավոր էջի «Մուտք» դաշտում մուտքագրեք Ձեր էլ․փոստի հասցեն և գաղտնաբառը։ Սեղմեք «Մուտք» կոճակը։
Կբացվի Ձեր անձնական էջը, որտեղ կերևան անձնական տվյալներ, կցված փաստաթղթեր, հետագայում նաև ներկայացված հայտեր։
Քայլ 5․ «Կառավարման վահանակ» դաշտում ընտրեք «Իմ էջը»։ Կերևան Ձեր էլ․ փոստի հասցեն և հեռախոսահամարը։ Այս էջում կարող եք կցել նաև փաստաթղթեր։
Քայլ 6․ «Իմ էջը» դաշտում փաստաթուղթ կցելու համար անհրաժեշտ է սեղմել «Տեղադրել» կոճակը, այնուհետև Ձեր համակարգչից ներբեռնել անհրաժեշտ փաստաթուղթը (Նկար 7)։
Անձնական էջում հնարավոր է կցել հետևյալ փաստաթղթերը՝
- Բարձրագույն կրթության դիպլոմի բնօրինակի տեսաներածված (scan) տարբերակը,
- Անձնագրի կամ նույնականացման քարտի բնօրինակի տեսաներածված (scan) տարբերակը,
- Ինքնակենսագրություն,
- Բնութագիր նախկին աշխատավայրից (առկայության դեպքում),
- Մասնագիտական գիտելիքների և աշխատանքային ունակությունների տիրապետման տեսանկյունից ներկայացվող պահանջների բավարարումը հավաստող այլ փաստաթղթեր (դիմումատուի ցանկությամբ)։
Քայլ 7․ Ձեր անձնական էջից մուտք գործեք kadrer.emis.am հարթակ:
Քայլ 8․ Ծանոթացե’ք ներկայացված թափուր հաստիքներին։ Սեղմելով «Դիտել» կոճակը՝ կարող եք տեսնել այն բոլոր պահանջները, որոնց պետք է բավարարեք դիմելու համար։
Քայլ 9․ Սեղմե’ք «Դիմել հայտ» կոճակը։ Ձեր հայտն ուղարկված է։ Այն կարող եք գտնել նաև կառավարման վահանակի «Իմ հայտերը» ենթաբաժնում։
Քայլ 10․ Արդեն իսկ ներկայացված հայտը չեղարկելու համար պետք է սեղմեք «Չեղարկել» կոճակը: 10 օրվա ընթացքում հայտը չեղարկելու պարագայում կարող եք նոր հայտ ուղարկել։ Այդ հայտի գրանցման պահից հաշված ևս 10 օրվա ընթացքում կարող եք կատարել ևս մեկ չեղարկում։ Երրորդ անգամ հայտը չեղարկել համակարգը թույլ չի տա։
Մեկից ավելի հայտ ներկայացնել չեք կարող։
Քայլ 11․ Հետևե’ք հայտի ընթացքին «Իմ հայտեր» ենթաբաժնում։ Ձեր հայտն ընդունելու կամ մերժելու իրավասությունը վերապահված է ԿԳՄՍ նախարարությանը։
Մերժման պարագայում հայտի կողքին կպատկերվի «Չեղարկված է ադմինիստրատորի կողմից» հաղորդագրությունը։
Եթե հայտը հաստատվի, նույն տեղում կտեսնեք «Ընդունված է» հաղորդագրությունը։
Հիշեցնենք՝ հոկտեմբերի 12-ին կառավարությունն ընդունել է 2023 թվականին Լեռնային Ղարաբաղից (Արցախ) բռնի տեղահանված ուսուցչների օժանդակության ծրագիրը։
Ծրագրի շահառու է հանդիսանում Արցախից բռնի տեղահանման հետևանքով Հայաստանի Հանրապետությունում բնակություն հաստատած և «Հանրակրթության մասին» օրենքի պահանջներին համապատասխանող այն անձը, որը ցանկություն ունի աշխատելու ՀՀ մարզերի բնակավայրերի պետական հանրակրթական ուսումնական հաստատություններում։
