Երկիրն՝ Արեգակի շուրջն իր տարեկան պտույտի ժամանակ, անցնում է մի շարք երկնաքարերի կույտերի միջով, որոնք թափանցելով Երկրի մթնոլորտ այրվում են և «ընկնող աստղեր» հիշեցնող հետքեր թողնում։ Այս երևույթները հայտնի են «աստղաթափ» կամ «աստղային անձրև» անվանումներով։
Այս օրերին դիտվում է տարվա առատ հոսքերից վերջինը` Գեմինիդների ասուպային հոսքը, հայտնում են Բյուրականի աստղադիտարանից։
Ասուպային այս հոսքը սովորաբար դիտվում է նոյեմբերի 19-ից դեկտեմբերի 24-ը: Այս տարի այն իր առավելագույն փուլում կլինի այսօր՝ դեկտեմբերի 13-14-ի գիշերը` ապահովելով ավելի քան 100 ասուպ մեկ ժամում (կատարյալ մութ երկնքի պայմաններում)։
Գեմինիդների ասուպային հոսքը հյուսիսային երկնքի ամենաառատ հոսքն է: Գեմինիդների ասուպային հոսքի կենտրոնը, որն աստղագիտության մեջ կոչվում է ասուպային հոսքի ռադիանտ, գտնվում է Երկվորյակներ (Gemini) համաստեղության ուղղությամբ:
Գեմինիդների ասուպային հոսքը հետաքրքիր է նաև նրանով, որ դրա ասուպները ոչ թե գիսավորի, այլ Փաետոն 3200 աստղակերպի թողած երկնաքարերն են: Այս պատճառով դրանք ավելի կարծր են և հետևաբար ասուպներն ավելի պայծառ են գիշերային երկնքում:
Հավելենք, որ Հայաստանի տարբեր շրջաններից հնարավոր կլինի դիտել ասուպային հոսքը, սակայն տեսանելիությունը կախված է եղանակային պայմաններից։
