Ադրբեջանում այրվում են հարավային շրջանների անտառները. տեսանյութ

Ադրբեջանում անտառային հրդեհի նոր օջախ է հայտնաբերվել հարավարևելյան Լենքորանի շրջանի Օսակյուչ անտառային տնտեսության տարածքում: «Արմենպրես»-ի հաղորդմամբ՝ այս մասին հայտնում է «Սպուտնիկ Ադրբեջանը»՝ հղում անելով Ադրբեջանի էկոլոգիայի և բնական ռեսուրսների նախարարությանը:

Հաղորդվում է, որ առայժմ չի հաջողվել տեղայնացնել նաև Յարդիմլիի շրջանում օգոստոսի 2-իմ բռնկված հրդեհը: Ադրբեջանական ԱՊԱ գործակալությունը գրում է, որ այս շրջանում հրդեհի մարման աշխատանքներին ներգրավված են մեծ թվով ուժեր, այդ թվում՝ 130 հրշեջ, արտակարգ իրավիճակների ծառայության ստորաբաժանումները, տեղի բնակիչները և մեկ ուղղաթիռ:

Հավելենք, որ հուլիսի 28-ից հրդեհներ են մոլեգնում նաեւ Թուրքիայում։ Հրդեհի ավելի քան 150 օջախներից 13-ում շարունակվում են կրակի տեղայնացման աշխատանքները։ Զոհերի թիվը 8 (այլ տվյալներով՝ 10) է։ Տուժել է ավելի քան 800 մարդ։