Կոտայքի մարզի Զովունի գյուղի հուշահամալիրում տեղի է ունեցել խաչքարի բացման արարողություն՝ նվիրված կյանքը հանուն հայրենիքի զոհած հերացիականներից՝ բուժծառայության պետ, բուժծառայության կապիտան Արամայիս Հայրապետյանին։
Արարողությանը ներկա էր ԵՊԲՀ ռազմաբժշկական ֆակուլտետի ղեկավարությունը` գնդապետ Վարդան Ծատուրյանի գլխավորությամբ, կուրսանտներ, դասախոսներ։
Զովունին 28 տարեկան ռազմական բժշկի ծննդավայրն է։ Երեք տարի Արամայիս Հայրապետյանը մասնագիտական պարտքը կատարել է Մարտունիում։ Նախորդ տարի էր տեղափոխվել Երևան՝ ընդունվելով ԵՊԲՀ կլինիկական օրդինատուրա. ապագա քիթ-կոկորդ-ականջաբան էր: Մայիսը, ինչպես նրան դիմում էին ընտանիքում, նշանադրվել էր իր ծննդյան օրը՝ սեպտեմբերի 26-ին։
Հաջորդ օրը սկսվեց պատերազմը՝ փոխելով շատերի` այդ թվում նրա կյանքի ընթացքը: Արցախում հոկտեմբերի 1-ից սկսած Արամայիս Հայրապետյանը թեժ մարտերի ժամանակ կրակահերթի տակ տեղափոխել է շատ վիրավորների, օգնել է կռվի դաշտից դուրս բերել բազմաթիվ հերոսների մարմինները։
Զոհվել է պատերազմի 40-րդ օրը՝ ականի պայթյունից։
Արամայիս Հայրապետյանին ՀՀ նախագահի հրամանագրով հետմահու շնորհվել է «Մարտական խաչ» 1-ին աստիճանի շքանշան, իսկ ԼՂՀ նախագահի հրամանագրով պարգևատրվել է «Արիության համար» մեդալով։
Comment here
Դուք պետք է մուտք գործեք՝ մեկնաբանությունը ուղարկելու համար։