Ամփոփվել են «Հայաստանի դպրոցական լավագույն մինի այգի 2025» ամենամյա մրցույթի արդյունքները։ Նախաձեռնությունն իրականացրել են ԿԳՄՍ նախարարությունը, ՄԱԿ-ի Պարենի համաշխարհային ծրագիրը (ՄԱԿ ՊՀԾ), ՌԴ ճյուղային սննդի ինստիտուտը (SIFI) և «Դպրոցական սնունդ և երեխաների բարեկեցություն» հիմնարկը։
Այս անգամ մրցույթն անցկացվել է «Մեր դպրոցական այգու պահապանը» խորագրով՝ խթանելով աշակերտների ստեղծագործական մտածողությունն ու թիմային աշխատանքը, շրջակա միջավայրի նկատմամբ պատասխանատվության զգացումը։ Մասնակից դպրոցներին առաջարկվել է ստեղծել այգու խորհրդանշական պահապան-թալիսմաններ, մշակել դրանց պատմությունը և ձևավորել այգիները՝ բնության հետ ներդաշնակության գաղափարով։ Մասնակիցները ոչ միայն իրենց հերոսների պատմություններն են հորինել և ձևավորել այգիները, այլև պատմությունները հասցրել են դպրոցների ագրո-խմբեր։
Մասնակցության հայտ է ներկայացրել 24 դպրոց՝ ՀՀ 6 մարզից և Երևանից։ Մայիսին մեկնարկած ծրագրի շրջանակում բոլոր մասնակիցները ստացել են մասնագիտական խորհրդատվություն և մեթոդական աջակցություն՝ գաղափարները կյանքի կոչելու համար։
Մրցույթի պահանջներին համապատասխան՝ մասնակից դպրոցները մինչև 2025 թվականի դեկտեմբերի 1-ը ներկայացրել են իրենց նախագծային փաթեթները. հանձնաժողովի գնահատմանը ներկայացվել է 13 ամբողջական նախագիծ։
Մրցույթի հաղթողները
- Լանջաղբյուրի Վ․ Ադամյանի անվան միջնակարգ դպրոցը (Գեղարքունիքի մարզ)
- Նոր Գեղիի Յու․ Երիցյանի անվան թիվ 2 միջնակարգ դպրոցը (Կոտայքի մարզ)
- Ծակքարի միջնակարգ դպրոցը (Գեղարքունիքի մարզ)
- Խրախուսական մրցանակ 4-րդ տեղի համար՝ Վանաձորի Ծովակալ Իսակովի անվան թիվ 23 հիմնական դպրոցին (Լոռու մարզ)
- Խրախուսական մրցանակ 5-րդ տեղի համար՝ Գեղարքունիքի միջնակարգ դպրոցին (Գեղարքունիքի մարզ)։
- «Լավագույն այգին՝ պատուհանագոգին»՝ Նեղոցի Արթուր Բեկջանյանի անվան հիմնական դպրոց (Լոռու մարզ)։
Առաջին տեղը զբաղեցրած դպրոցը կստանա մրցանակ՝ 3000 ԱՄՆ դոլարին համարժեք դրամի չափով, իսկ 2-5-րդ տեղերը զբաղեցրած դպրոցները՝ իրենց դպրոցական ճաշարանների համար նախատեսված մրցանակներ։
Մեր տելեգրամյան ալիքը՝ t.me/usanoghnews
