ԳլխավորԼուր

Դպրոցներում գարնանային արձակուրդը շո՞ւտ կմեկնարկի․ Հայաստանում սուր շնչառական վարակների դեպքերն աճում են

Ջերմաչափ, երեխա

Սուր շնչառական վարակների դեպքերի աճով պայմանավորված՝ այս օրերին ամենաշատ տրվող հարցերից մեկն այն է, թե արդյոք հնարավո՞ր է՝ դպրոցականների գարնանային արձակուրդը մեկնարկի ավելի վաղ:

ԿԳՄՍ նախարարությունն այդ առթիվ տարածել էր հայտարարություն, որտեղ նշվում է, որ սուր վարակիչ հիվանդությունների աճի և համաճարակային իրավիճակի առկայության դեպքում Հայաստանի դպրոցներում կանխարգելիչ միջոցառումները նախաձեռնվում և իրականացվում են՝ համաձայն Հայաստանի առողջապահության նախարարության ցուցումների.

«Արձակուրդ ևս կարող է սահմանվել Առողջապահության նախարարության համապատասխան միջնորդության առկայության դեպքում»,-ասված է հայտարարությունում:

Usanogh.am-ը առողջապահության նախարարի մամուլի խոսնակ Հռիփսիմե Խաչատրյանից հետաքրքրվեց` այս պահին նման հարց նախարարությունում քննարկվո՞ւմ է, թե՞ ոչ:

«Ոչ, նման հարց չի քննարկվում: Դպրոցական և նախադպրոցական ուսումնական հաստատություններում որպես կանխարգելիչ միջոցառում սահմանվել և կիրառվում է համաճարակաբանական ֆիլտր, որը ենթադրում է սովորողի և մանկավարժի ջերմաչափում և արտաքին զննում, եթե դրա կարիքը լինի: Նպատակն այն է, որ հիվանդը մյուս երեխաների կամ գործընկերների շրջանում սուր շնչառական հիվանդություն չտարածի»,-նշեց Հռիփսիմե Խաչատրյանը:

Հայաստանում կարմրուկի հաստատված դեպքերի թիվը այսօրվա դրությամբ հասավ արդեն 50-ի, և դպրոցական, նախադպրոցական տարիքի երեխաներ ունեցող շատ ծնողների հուզում է նաև այն հարցը, թե արդյոք հնարավո՞ր է, որ իրավիճակը ուսումնական հաստատություններում վերահսկողությունից դուրս գա. «Կարմրուկով պայմանավորված իրավիճակը Հայաստանում վերահսկելի է: Կարմրուկի պարագայում մենք գործ ունենք լոկալ բռնկման հետ: Պարզապես ուշագրավն այն է, որ Հայաստանում վաղուց նույնիսկ լոկալ բռնկում չէր գրանցվել. մենք ժամանակ առ ժամանակ ունենում էինք «բերովի» հատուկենտ դեպքեր միայն: Այնպես որ, կարմրուկով պայմանավորված ևս արձակուրդը վաղ մեկնարկելու կամ երկարաձգելու ծրագիր նախարարությունում չի քննարկվում. դրա կարիքը չկա»-մեկնաբանեց Հռիփսիմե Խաչատրյանը: