Ադրբեջանը հայ-ադրբեջանական սահմանին օգտագործել է տեղում առկա գրեթե բոլոր զինատեսակները

Ադրբեջանական զինված ուժերը հայ-ադրբեջանական սահմանին օգտագործել են տեղում առկա իրենց գրեթե բոլոր զինատեսակները: Այս մասին հուլիսի 15-ին Իջևանում՝ ճգնաժամային տեղեկատվական կենտրոնում տեղի ունեցած ճեպազրույցի ընթացքում ասաց Պաշտպանության նախարարության Վազգեն Սարգսյանի անվան ռազմական համալսարանի հրամանատարաշտաբային ֆակուլտետի պետ, ՊՆ նախկին խոսնակ Արծրուն Հովհաննիսյանը:

«Ադրբեջանական Զինված ուժերը, այդ թվում և’ սահմանապահ ծառայությունը, և’ երրորդ բանակային կորպուսը, իրենց սպառազինությունում եղած գրեթե ողջ զինանոցը կիրառել են, բացառությամբ մի քանի միջոցների: Օգտագործվել են բոլոր տրամաչափի հրաձգային զենքերը, տանկեր, հրետանային միջոցներ, ընդուպ 122 մմ և չի բացառվում, որ ավելի մեծ տրամաչափերի, հրետանային միջոցների մեծ մասը, բացառությամբ մի քանի միջոցների, ականանետեր, հարվածային ԱԹՍ-ներ»,- ասաց Հովհաննիսյանը:

Հիշեցնենք, որ հուլիսի 12-ին ադրբեջանական զինված ուժերը հրետակոծել են Հայաստանի Հանրապետության սահմանային դիրքեր Տավուշի ուղղությամբ։ Թեժ մարտերի հետեւանքով հայկական կողմից կա 4 զոհ, այս պահին՝ 10 վիրավոր, ադրբեջանական կողմից՝ առնվազն 12 զոհ, վիրավորների թիվը ստույգ չի նշվում։

Լուսանկարը՝ «Ֆոտոլուրի» արխիվից։