Շիրակի մարզպետարանի ենթակայությամբ գործող 128 դպրոցներին նախատեսվում է ներկայացնել կապիտալ դրամաշնորհներ 264 միլիոն 361 հազար դրամի չափով, որից 233 միլիոն 997 հազար դրամը` դպրոցների խնայողությունների հաշվին, իսկ 30 միլիոն 363 հազար դրամը` ԿԳՄՍ նախարարության 2023 թվականի պետական բյուջեի վերաբաշխման միջոցով: Այս մասին այսօր կառավարության նիստում հայտնեց ԿԳՄՍ նախարար Ժաննա Անդրեասյանը: Նրա խոսքով` գումարն ուղղվելու է դպրոցների ճաշարանների համար անհրաժեշտ գույքի և սարքավորումների ձեռքբերմանը:
«Շիրակի մարզը 2018-ի սեպտեմբերից մասնակցում է «Կայուն դպրոցական սնունդ» ծրագրին, ֆինանսավորումն իրականացվում է պետական բյուջեի շրջանակներում, և ծրագրի արդյունավետ իրականացման համար անհրաժեշտ է դպրոցների ճաշարաններն ապահովել համապատասխան շենքային պայմաններով, ինչպես նաև հարկավոր է ապահովել գույքի, սարքավորումների և այլ պարագաների առկայությունը»,-ասաց նախարարը:
Նա շեշտեց` ուսումնասիրվել են Շիրակի մարզի դպրոցների բոլոր ճաշարանները, գնահատումն իրականացվել է 146 դպրոցներում, արդյունքում պարզ է դարձել, որ 31 դպրոց ունի թե´ ճաշարանի կամ խոհանոցի ընթացիկ նորոգման, թե´ խոհանոցային սպասքի, գույքի և սարքավորումների ձեռքբերման կարիք։
Կառավարությունը կողմ քվեարկեց նախագծին:
Մանրամասները՝ տեսանյութում։