Գլխավոր շտաբը կրկին հայտարարություն է տարածել

Զինված ուժերի ղեկավար կազմը կրկին հաստատում է ստեղծված իրավիճակի վերաբերյալ իր գնահատականները և շեշտում, որ, անկախ Զինված ուժերը քաղաքական գործընթացների մեջ ներքաշելու փորձերից, մնում Է անդրդվելի, կշռադատված և հաստատակամ։

Այս մասին նշված է ՀՀ ԶՈւ Գլխավոր շտաբի տարածած հայտարարության մեջ։

Զինված ուժերը, կազմված լինելով մեր ժողովրդի զավակներից և կանխազգալով ազգային անվտանգության սպառնալիքները, անթույլատրելի է համարում և հորդորում է դադարեցնել Զինված ուժերին և առանձին պաշտոնատար անձանց ուղղված անհիմն մեղադրանքները։

Առկա իրավիճակը փաստում է, որ Զինված ուժերը առաջնորդվում է բացառապես պետական շահով և ծառայում է միայն ու միայն իր ժողովրդին՝ ղեկավարվելով Հայաստանի Հանրապետության Սահմադրության և իրավունքի նորմերով։

Հավելենք, որ այսօր հրավիրված հանրահավաքում վարչապետ Նիկոլ Փաշինյանը կրկին պահանջեց, որ ԳՇ պետը հեռանա կամ հեռացվի նախագահի կողմից իր պաշտոնից։

Հիշեցնենք, որ ավելի վաղ ԳՇ-ն պահանջել էր վարչապետ Նիկոլ Փաշինյանի ու կառավարության հրաժարականը։