Իրանի առողջապահության և կրթության նախարարությունները հայտարարել են, որ իրենց կրթական կենտրոնները ծառայություններ չեն մատուցի այն ուսանողուհիներին, ովքեր չեն հետևում պարտադիր հիջաբ կրելու պահանջին, հայտնում է iranintl.com-ը:
Ապրիլի 3-ին Իրանի նոր տարում համալսարանների բացման շնորհավորական ուղերձում առողջապահության փոխնախարար Աբբաս Շիրոջանը շնորհակալություն է հայտնել ուսանողներին, ովքեր հետևում են «դրեսկոդին» և հայտարարել է, որ առողջապահության նախարարության համալսարանները ծառայություններ չեն մատուցի առանց հիջաբ ուսանողուհիներին:
Կրթության նախարարությունն իր հերթին հայտարարել է, որ հիջաբ կամ այլ գլխաշոր չկրող ուսանողուհիներին չի թույլատրվի հաճախել դասերի:
Հիշեցնենք, որ հիջաբ կրելու կանոնների խախտումը ՝ որպես քաղաքացիական անհնազանդության ձև, տարածվել է ամբողջ երկրում 2022-ի սեպտեմբերի կեսերին բարքերի ոստիկանության կողմից ձերբակալված 22-ամյա Մահսա Ամինիի մահից հետո:
