ՀՀ ԿԳՄՍ նախարար Վահրամ Դումանյանը, այսօր ԱԺ-ում պատասխանելով լրագրողների հարցերին, անդրադարձել է Կոտայքի մարզի Աբովյան քաղաքի Խ. Աբովյանի անվան թիվ 1 ավագ դպրոցի տնօրենի ընտրության գործընթացին: Նախարարը նշել է, որ հավասար ձայներ հավաքած թեկնածուներից որևէ մեկին չի ճանաչում և ընտրությունը կատարել է բացառման սկզբունքով:
«Դպրոցի առաքելությունն աշակերտներին որակյալ կրթություն տալն է, այլ ոչ թե աշակերտներին անհիմն շահարկումների մեջ ներքաշելը, ինչը չի նպաստում նրանց կրթության իրավունքի իրացմանը: Ընտրություն կատարելիս առաջնորդվել եմ այս սկզբունքով: Դպրոցում ամենակարևոր պաշտոնն ուսուցչինն է, այլ ոչ թե տնօրենինը: Աշակերտների կրթության իրավունքը մեզ համար գերակա շահ է, և այս ընթացքում բաց թողնված դասերը պետք է լրացվեն»,- ասել է Վ. Դումանյանը:
Դպրոցների տնօրենների նշանակման գործընթացում բացառելով պետական պաշտոնյաների հովանավորչության հանգամանքը՝ ԿԳՄՍ նախարարն ընդգծել է, որ հնարավոր անօրինականությունները բացառելու համար հարկավոր է գնալ իրավական, այլ ոչ թե նախարարի, նախարարության կամ աշակերտների վրա ճնշում գործադրելու ճանապարհով:
Հիշեցնենք, որ փետրվարի 4-ից վերը նշված դպրոցում գործադուլ ու դասադուլ է. աշակերտներն ու ուսուցիչները պահանջում են չեղյալ հայտարարել դպրոցի տնօրենի ընտրությունները, որի արդյունքով տնօրեն է նշանակվել Քարմիլե Առաքելյանը՝ փոխարինելով Մետաքսյա Բաբայանին։
Խնդրի վերաբերյալ հայտարարությամբ հանդես էր եկել նաեւ ՀՀ Մարդու իրավունքների պաշտպան Արման Թաթոյանը։
Comment here
Դուք պետք է մուտք գործեք՝ մեկնաբանությունը ուղարկելու համար։