Հունվարի 1-ի դրությամբ դատաբժշկական փորձաքննության է ենթարկվել 3330 մարմին: Մարմինների նույնականացման և ճանաչման գործընթացի կազմակերպման համար պատերազմի սկզբից մինչ օրս մարմիններից և աճյուններից վերցվել է 1441 նմուշ: Այս մասին «Ֆեյսբուք»-ի իր էջում գրել է ՀՀ առողջապահության նախարարի մամուլի խոսնակ Ալինա Նիկողոսյանը։
Հունվարի 1-ի դրությամբ մարմինների կամ աճյունների 871 նմուշ գտնվում է հետազոտման փուլում:
Հիշեցենք, որ սեպտեմբերի 27-ին Ադրբեջանը Թուրքիայի մեծածավալ աջակցությամբ հարձակվեց Արցախի վրա։ Պատերազմական գործողությունները դադարեցվեցին նոյեմբերի 9-ին Հայաստանի, Ռուսաստանի ու Ադրբեջանի միջեւ եռակողմ հայտարարության ստորագրումից հետո։
Հայտարարության համաձայն՝ Ադրբեջանին հանձնվեցին Արցախի մերձակա ազատագրված 7 շրջաները, ինչպես նաեւ բնակավայրեր Հադրութից ու Մարտակերտից։
Արցախում ու Լաչինի միջանցքում տեղակայվել են ռուս խաղաղապահներ։
Մինչ օրս հրապարակվել է հայկական կողմի մոտ 2100 զոհի անուն։ Զոհերի, վիրավորների, գերիների ու անհետ կորածների թվի վերաբերյալ պաշտոնական վերջնական տվյալներ չկան։
Նախնական տվյալներով՝ զոհերի թիվը մոտ 5000 է, վիրավորներինը՝ 10 հազար։
Comment here
Դուք պետք է մուտք գործեք՝ մեկնաբանությունը ուղարկելու համար։