Երևանի Շենգավիթ վարչական շրջանի Ներքին Չարբախ թաղամասում տեղի ունեցավ պրոֆեսիոնալ բռնցքամարտիկ, աշխարհի բազմակի չեմպիոն Արթուր Աբրահամի կողմից հիմնված այգու բացման հանդիսավոր արարողությունը:
Արթուր Աբրահամը դիմելով ներկաներին ասաց, որ իր համար մեծ պատիվ է հիմնել այդ այգին և նվիրել բոլորին:
«Ինչպես գիտեք, իմ մանկությունն անցել է Երևանի Շենգավիթ վարչական շրջանի այս հրաշալի թաղամասում՝ Ներքին Չարբախում: Հետագայում մեծ ու շքեղ քաղաքներ շատ եմ այցելել, սակայն Ներքին Չարբախն ինձ համար եղել և մնում է աշխարհի կենտրոնը՝ իմ սրտի բնակավայրը, իմ մանկության քաղցր հիշողությունների վկան, ինչպես նաև իմ և ձեր վաղվա լուսավոր, երջանիկ օրերի անբաժան մասը:
Այստեղ ես սովորել եմ ապրել, ընկերներ ձեռք բերել, երազանքներ պահել, գնալ այդ երազանքների հետևից, պայքարել հանուն հաջողությունների և հասնելով դրանց՝ վայելել:
Այս այգին մեզ բոլորիս՝ մեր ընտանիքներին, մեր երեխաներին հանգստություն, ուրախ ժամանց, առողջ ապրելակերպ և հարմարավետություն է պարգևելու, մեր զավակների անհոգ մանկության քաղցր հուշերը նաև այս այգու հետ են կապվելու: Մեծ սիրով, նվիրումով, հոգատարությամբ և բարձր որակով եմ հիմնել մեր այգին:
Սա իմ նվերն իմ սիրելի Ներքին Չարբախին, սա մեր՝ բոլորիս այգին է, և ուրեմն եկեք սիրով վերաբերվենք, մաքուր պահենք, հոգ տանենք, խնամենք, ջրենք, որ մեր այգին էլ ավելի գեղեցկանա»,-մասնավորապես նշեց Արթուր Աբրահամը։