Ֆրանսիան կրկին այրվում է. պատճառը ոստիկանի կողմից պատանու սպանությունն է. ՏԵՍԱՆՅՈւԹ

Այս գիշեր Ֆրանսիայի տարբեր քաղաքներում անկարգությունների ընթացքում ավելի քան 1.3 հազար մեքենա և 234 շենք է հրկիզվել, տուժել է 79 ոստիկան, ձերբակալվել է ավելի քան 1300 մարդ, նրանց մեջ շատ են 13-14 տարեկան դեռահասները։ Տեղեկությունը հայտնում է BFMTV հեռուստաալիքը։

«Ինչ վերաբերում է նյութական վնասին, խոսքը հասարակական վայրերում 2 560 հրդեհների մասին է` 1350 հրկիզված մեքենա և 234 վնասված կամ հրկիզված շենք», – հայտնում է հեռուստաալիքը։

Ցուցարարները հարձակվել են ոստիկանական 31, մունիցիպալ ոստիկանության 16 բաժանմունքի և ժանդարմերիայի 11 զորանոցների վրա։

Հիշեցնենք` հունիսի 27-ի առավոտյան ոստիկանները Նանտերում՝ Փարիզից արևմուտք գտնվող արվարձանում, ստուգման ժամանակ սպանել են 17-ամյա դեռահասի, որը, ըստ ոստիկանների, հրաժարվել է կատարել իրենց պահանջները: Դրանից հետո Ֆրանսիայի մի շարք քաղաքներում անկարգություններ են սկսվել, որոնք շարունակվում են արդեն մի քանի օր: Մի շարք քաղաքներում ոստիկանական հատուկջոկատայիններ են տեղակայվել, գործի են դրվել ուղղաթիռներ և զրահատեխնիկա։

Դեռահասի հուղարկավորությունը տեղի կունենա այսօր՝ Նանտերում։

Հիշեցնենք, որ անկարգությունների մեծ ալիք էր բարձրացել Ֆրանսիայում նաև մի քանի ամիս առաջ՝ ֆրանսիացիները բողոքում էին կենսաթոշակային բարեփոխման դեմ։