ՀՀ կրթության, գիտության, մշակույթի և սպորտի նախարարությունն այս տարի առաջին անգամ անցկացրել է «Տարվա լավագույնները» մրցույթը։
Վանաձորի թիվ մեկ հիմնական դպրոցի հայոց լեզվի և գրականության ուսուցիչ Լուսինե Կոստանյանը մրցույթին ներկայացրել է «Մեդիաիմացությունը և գրականությունը՝ նորարարական տեխնոլոգիաների արդյունավետ կիրառմամբ» նախագիծը, որը «Հանրակրթական ուսումնական հաստատության ուսումնաօժանդակ գործունեության լավագույն ծրագիր» անվանակարգի հաղթող նախագծերից մեկն է: Ծրագրի իրականացման միտքը Լուսինեն հղացել է «Մեդիա» նախաձեռնությունների կենտրոնի կազմակերպած «Մեդիագրագիտության ամառային դպրոց՝ ուսուցիչների համար» վերապատրաստման դասընթացին մասնակցելուց հետո:
«Հետագայում մտահղացման իրագործմանը նպաստեցին նաև համավարակը և պատերազմը՝ էլ ավելի թափանցիկ դարձնելով այն բացը, որն առկա է մեդիադաշտում՝ մեդիաիմացության տեսանկյունից, և որի պակասը զգալի է մեր հասարակության մեջ: Այդ կարևոր բացն էլ պետք է լրացնել դպրոցում, որտեղ սովորողները ձեռք են բերում ոչ միայն առարկայական գիտելիքներ, այլև կարողություններ, հմտություններ, ձևավորվում է նրանց արժեքային համակարգը»,- ասում է Լուսինեն՝ ընդգծելով, որ արդյունավետ դպրոց ունենալու համար հարկավոր է ներմուծել և կիրառել նորը՝ հենվելով ավանդական դպրոցի որոշ սկզբունքների վրա:
«Հնի ու նորի առողջ, արդյունավետ համադրում. այսօր սա է ամենակարևորը, որը, սակայն, ամենից շատ է պակասում մեր կրթական համակարգում: Այդ նպատակով նախաձեռնեցի «Մեդիաիմացությունը և գրականությունը՝ նորարարական տեխնոլոգիաների արդյունավետ կիրառմամբ» նախագիծը, որի նպատակն է բարձրացնել մեդիագրագիտության վերաբերյալ աշակերտների գիտելիքները և դրանք առավել ամրապնդել դաս-քննարկումների կամ միջոցառումների ընթացքում: Ծրագիրը հետապնդում է երեք նպատակ՝ հոգեբանական, սոցիալական և կրթական: Որպես հոգեբանական գործոն՝ կարևորվում են ժողովրդավարությունը, վստահությունը և սահուն ինտեգրումը հասարակությանը: Սոցիալական նպատակը ներառում է՝ շփման էթիկա, գրելուց, խոսելուց առաջ մտածել, չծիծաղել ուրիշի սխալների վրա, գրագետ բանավիճել: Կրթական բաղադրիչն աշակերտների շրջանում զարգացնում է քննադատական մտածողությունը, մեդիաիմացությունը, խոսքի ազատությունը, մեդիայի հնարավորությունների ճիշտ օգտագործումը և իրավունքների իմացությունը»,- իր նախագծի մասին պատմում է Լուսինեն:
Նրա խոսքով՝ ծրագրի արդյունքում սովորողները կկարողանան ուսումնական գործընթացում արդյունավետ կիրառել ՏՀՏ գործիքները և էլեկտրոնային կրթական ռեսուրսները՝ բազմազան ու բազմաթիվ մուլտիմեդիա ու առցանց ուսումնական ռեսուրսները, ինչպես նաև ուսուցման նոր մեթոդների և տեխնոլոգիաների արդյունավետ կիրառումը համակցել ուսուցման ավանդական մեթոդների հետ: Ըստ Լուսինեի՝ հաշվի առնելով, որ մեդիաիմացությունը չի սահմանափակվում միայն կեղծ և հավաստի լուրերը տարբերակելով կամ համացանցային էթիկայով, ծրագրի շարունակականության ապահովման համար կարելի է նույն հաջողությամբ ընդգրկել նաև մեդիագրագիտության տարաբնույթ թեմաներ:
Comment here
Դուք պետք է մուտք գործեք՝ մեկնաբանությունը ուղարկելու համար։