Հայտնի են «Աշխարհագրություն», «Կենսաբանություն» և «Համաշխարհային պատմություն» առարկաների քննությունների թվային արդյունքները

Հանրապետության 15 քննական կենտրոններում հունիսի 8-ին անցկացված «Աշխարհագրություն», «Կենսաբանություն» և «Համաշխարհային պատմություն» առարկաներից միասնական քննությանն այս տարի մասնակցել է 1513 դիմորդ:

Գնահատման և թեստավորման կենտրոնից տեղեկացնում են, որ «Աշխարհագրություն» առարկայից քննությանը մասնակցել են բոլոր հայտարարագրվածները՝ 187 հոգի: Այդ առարկայից միջին միավորը եղել է 13.99:

«Աշխարհագրություն»-ից դրական միավորի շեմը չհաղթահարածների թիվը 19 է, իսկ 18-20 միավոր հավաքածների թիվը՝ 43: Ընդհանուր առմամբ 2020 թվականի համեմատ դիմորդների թիվը պակասել է: Նախորդ տարի «Աշխարհագրություն» առարկայից քննություն է հանձնել 282 հոգի:

«Համաշխարհային պատմություն»-ից մասնակցել է հայտարարագրված 31 հոգուց 29-ը: Միջին միավորն այս առարկայից եղել է 13.06: Դրական միավորի շեմը չհաղթահարածների թիվը 7-ն է, 18-20 միավոր հավաքածների թիվը նույնպես 7 է: 2019-ին «Համաշխարհային պատմություն» առարկայից քննություն է հանձնել 40 հոգի:

«Կենսաբանություն» առարկայի միասնական քննությանը մասնակցել է 1361 հայտարարագրվածից 1297-ը: Միջին միավորն այս առարկայից եղել է 12.75: Դրական միավորի շեմը չհաղթահարածների թիվը 274 է, իսկ 18-20 միավոր հավաքածների թիվը՝ 305: 2020 թվականի համեմատ դիմորդների թիվն ավելացել է 219-ով:

Հիշեցնենք, որ առաջին փուլով քննություններին մասնակցելու հայտ է ներկայացրել 11 հազար 487 դիմորդ: Միասնական քննությունները կավարտվեն հունիսի 25-ին։