ՇՕ. հայ շախմատիստներն առաջատարի դիրքը զիջեցին ուզբեկներին

Հայաստանի տղամարդկանց հավաքականը Համաշխարհային շախմատային 44-րդ օլիմպիադայի 9-րդ տուրում պարտվեց Ուզբեկստանի թիմին 1:3 հաշվով և 15 միավորով երկրորդ հորիզոնականն է կիսում Հնդկաստանի երկրորդ թիմի հետ, տեղեկանում ենք ՖԻԴԵ-ի կայքից: Սա մեր հավաքականի առաջին պարտությունն էր։

Գաբրիել Սարգսյանը սև ֆիգուրներով ոչ–ոքի խաղաց Նոդիրբեկ Աբդուսատորովի հետ, Հրանտ Մելքումյանն էլ սպիտակներով ոչ–ոքի խաղաց Նոդիրբեկ Յակուբոևի հետ։

Սամվել Տեր-Սահակյանը պարտվեց Ջավոխիր Սինդարովին, իսկ Ռոբերտ Հովհաննիսյանը՝ Ջախոնգիր Վախիդովին։ Ուզբեկստանը 16 միավորով գլխավորեց մրցաշարային աղյուսակը։

Նախորդ տուրերում Հայաստանի հավաքականը հաղթել էր Մադագասկարին (4:0), Անդորրային (3:1), Եգիպտոսին (2,5:1,5), Ավստրիային (3:1), Անգլիային (2,5:1,5) և Հնդկաստանին (2,5:1,5), ոչ ոքի խաղացել՝ ԱՄՆ-ի հետ, հաղթել Հնդկաստանի թիմին (2,5:1,5):

Հիշեցնենք, որ օլիմպիադայում Հայաստանը ներկայացնում են գրոսմայստերներ Գաբրիել Սարգսյանը, Հրանտ Մելքումյանը, Ռոբերտ Հովհաննիսյանը, Սամվել Տեր-Սահակյանը, Մանուել Պետրոսյանը, Էլինա Դանիելյանը, միջազգային վարպետներ Լիլիթ Մկրտչյանը, Աննա Սարգսյանը, կանանց միջազգային վարպետներ Մարիամ Մկրտչյանն ու Սուսաննա Գաբոյանը։

Օլիմպիադայում 11 տուր կանցկացվի։ Այն կավարտվի օգոստոսի 10-ին։

Հավելենք, որ Հայաստանը 3 անգամ հաղթել է շախմատային օլիմպիադաներում (2006, 2008, 2012 թթ.)։