Ադրբեջանական ագրեսիայի հետևանքով Գեղարքունիքի մարզի 12 դպրոցում դեռևս դասապրոցես չի իրականացվում, այսինքն՝ 1245 աշակերտ զրկված է դպրոց հաճախելու հնարավորությունից: «Արմենպրես»-ի հաղորդմամբ՝ Գեղարքունիքի մարզպետ Կարեն Սարգսյանն այս մասին ասաց օտարերկրյա դիվանագետներին Վարդենիսում:
«Երեք բնակավայրում ավերվել են տներ, թիրախավորվել են դպրոցները, մանկապարտեզները և քաղաքացիական այլ ենթակառուցվածքներ: 148 բնակարան վնասվել է Սոթքում, 12 բնակարան վնասվել է Կութում և 2 բնակարան՝ Վերին Շորժայում: Սոթքում 7 տուն ամբողջությամբ ավերված է և նորը կառուցելու խնդիր ունենք: Մնացածի մասով կարիքներն ամբողջությամբ գնահատված են, առաջիկա օրերին բնակիչներին կլինեն փոխանցումները, որ սկսեն իրենց բնակարանների վերականգնման աշխատանքները»,-ասաց մարզպետը:
Այդ օրերին ռմբակոծությունների հետևանքով 12 բնակավայրերի բոլոր դպրոցները, նաև Ճամբարակ խոշորացված համայնքի բոլոր դպրոցներն ամբողջությամբ չեն աշխատել, այսինքն՝ դասապրոցես չի իրականացվել: 7072 աշակերտ չի հաճախել դպրոցներ, 897 երեխաներ չեն հաճախել մանկապարտեզներ և նախակրթարաններ:
«Այս պահի դրությամբ 12 դպրոցներում ևս դասապրոցեսներ չեն իրականացվում՝ նկատի ունենալով անվտանգության խնդիրները: 1245 աշակերտ չի հաճախում դպրոց»,-ասաց Սարգսյանը:
Հիշեցնենք` սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ, օգտագործվել են նաև ԱԹՍ-ներ։ Հայկական կողմը սեպտեմբերի 16-ի դրությամբ ունի 135 զոհ։
Սեպտեմբերի 28-ին՝ ժամը 18:00-ից սկսած, Ադրբեջանի ԶՈւ ստորաբաժանումները, ականանետերի և խոշոր տրամաչափի հրաձգային զինատեսակների կիրառմամբ, կրկին կրակ են բացել հայ-ադրբեջանական սահմանի արևելյան ուղղությամբ տեղակայված մարտական դիրքերի ուղղությամբ, հայկական կողմից կա 3 զոհ։
