Ուսումնական գործընթացը մեկնարկել է բոլոր դասարանների համար

Այսօրվանից ուսումնական գործընթացը մեկնարկել է ՀՀ բոլոր՝ 1-12-րդ դասարանների համար, տեղեկացնում են ԿԳՄՍ նախարարությունից։

Հիշեցնենք, որ համաձայն ՀՀ ԿԳՄՍ նախարարի դեկտեմբերի 30-ի N 49-Ն հրամանի՝ 1-ին և 2-րդ դասարանցիների ձմեռային արձակուրդը կրճատվել է ու տևել է մինչև հունվարի 10-ը, ինչպես սահմանված էր 3-12-րդ դասարանների սովորողների դեպքում։ Այսինքն՝ բոլոր աշակերտների համար դասապրոցեսը վերսկսվում է հունվարի 11-ից՝ հաշվի առնելով աշնան ամիսներին ունեցած մեկ ամիս դադարը, կորոնավիրուսային հիվանդության դեպքերի՝ ներկայումս նվազող թվերը և առաջիկա ամիսներին կանխատեսվող հնարավոր նոր ալիքը:

Սահմանված ժամկետների փոփոխության նպատակն է խուսափել հունիս ամսվա ընթացքում առաջին և երկրորդ դասարանցիների դասապրոցեսի կազմակերպումից, ինչը կարող է խնդրահարույց լինել շոգ եղանակին դիմակների կրման պարագայում։