Նախագահականից պարզաբանել են. «Ժողովուրդ»

Սոցիալական հարթակներում երեկ ակտիվորեն քննարկվում էին նախագահական նստավայրում կայացած ընդունելության կադրերը, որտեղ մասնակիցներն առանց դիմակների էին: ArmLur.am-ն այս հարցով դիմել էր նախագահականի լրատվականին:

«Հասկանալով մեր հայրենակիցների տարակուսանքը Հանրապետության նախագահի նստավայրում տեղի ունեցած պաշտոնական ընդունելության լուսանկարների առնչությամբ և ըմբռնումով մոտենալով նման արձագանքին՝ միաժամանակ, պարտավորված ենք զգում տեղեկացնել, որ միջոցառման բոլոր մասնակիցները, որոնք հիմնականում օտարերկրացիներ էին, ունեցել են ՊՇՌ թեստի բացասական արդյունք, նրանց գերակշռող մասը նաև պատվաստված է եղել կորոնավիրուսի դեմ։ Մասնակիցները դիմակներ կրել են ըստ ցանկության:

Համամիտ ենք այն տեսակետին, որ պատվաստումը վիրուսից պաշտպանվելու, համավարակը հաղթահարելու և բնականոն կյանքին վերադառնալու լավագույն ճանապարհն է»,- ի պատասխան ArmLur.am-ի հարցման՝ հայտնել են ՀՀ նախագահի աշխատակազմի հասարակայնության հետ կապերի վարչությունից։

Հավելենք, որ լուսանկարը պաշտոնական ընդունելությունից է, որը Արմեն Սարգսյանի անունից, ի պատիվ «Մտքերի հայկական գագաթաժողով»-ի մասնակիցների, կազմակերպվել է:ՀՀ նախագահի նստավայրում, հոկտեմբերի 24-ի երեկոյան։