Գլաստոնբերիում քեմպինգի լավ տեղ, Sephora-ի նոր խանութի բացում կամ Ուիմբլդոնի տոմսեր ձեռք բերելու հնարավորություն. սրանք այն բաներից են, որոնց համար մարդիկ կարող են հերթ կանգնել ամբողջ գիշեր: Բայց Օքսֆորդի Բրուքսի համալսարանի հաշվապահական հաշվառման և ֆինանսների առաջին կուրսի ուսանողուհի Բելլա Բարնսը BBC-ին պատմել է, որ 24 ժամ հերթ է կանգնել, որ բնակարան ստանա երկրորդ կուրսի համար։
Finders Keepers բնակարաննների վարձակալության գործակալությունը հայտնել է, որ նոյեմբերի 26-ին, ժամը 09:00-ին բացում է հայտագրումն իր ուսանողական հանրակացարանների համար, իսկ դիմումներն ընդունվում են կենդանի հերթի կարգով:
Ընկերության ներկայացուցիչ Վիկտորյա Լայլալն ասել է, որ որ իրենք «ակտիվորեն խանգարում են մարդկանց հերթ կանգնել», և կան շատ խոչընդոտներ, որոնք կարելի է շրջանցել, բայց Բելլա Բարնսի կարծիքով՝ ինքն այլընտրանք չուներ:
Նա հայտնել է, որ երբ ինքն ու իր 4 հարեւանուհիները գտել են բնակարանը առցանց ու դիմել են այն տեսնելու համար, իրենց հայտնել են, որ պետք է առավոտյան 9-ին գան գործակալություն։
Նրանք 40 հոգանոց հերթում չորրորդն են եղել, ու միմյանց փոխարինելով են սպասել։ Ինքը՝ Բարնսը, հերթում է եղել երկուշաբթի ժամը 17:00-ից մինչև երեքշաբթի ժամը 03:00-ն, իսկ հետո վերադարձել է ժամը 09:00-ից անմիջապես առաջ:
Ի վերջո՝ նրանց հաջողվել է վարձակալել իրենց ուզած բնակարանը, բայց ենթադրում են, որ հաջորդ տարի ստիպված կլինեն անցնել նույն ճանապարհով։
