«Հայաստանի ազգային պոլիտեխնիկական համալսարան» հիմնադրամի Ուսանողական խորհրդի ընդհանուր ժողովը ամփոփել է 2021-2023 թվականների աշխատանքը: Վերջին տարիներին կառույցը ղեկավարած Միքայել Մարտիրոսյանը հաշվետվությունում նշել է գործունեության հիմնական ուղղությունները.
- Գիտական և կրթական,
- Մշակութային,
- Ինտելեկտուալ,
- Ռազմահայրենասիական և սպորտային,
- Հասարակական։
Բացի նշվածներից, որոնցից յուրաքանչյուրը բազմաբնույթ միջոցառումների ամբողջություն է, իրականացվել են նաև խոշորամասշտաբ նախագծեր։ Պոլիտեխնիկցիների կյանքում հատուկ դեր ունի «Միասնության ուժը» ուսանողական-երիտասարդական ռազմահայրենասիրական հավաքը, Եռագույնը խորհրդանշող երեք ճակատ, մեկ կարգախոս՝ հզոր ենք, երբ միասին ենք, թվով 8 անգամ կյանքի է կոչվել Պոլիտեխնիկի «Միասնության ուժը» ուսանողական-երիտասարդական ռազմահայրենասիրական հավաքը, ամեն տարի իր շուրջը համախմբելով ավելի քան 200 ուսանող:
ՀԱՊՀ-ի ուսանողները, վարչական ու պրոֆեսորադասախոսական կազմի ներկայացուցիչները բարձր են գնահատել Ուսանողական խորհրդի աշխատանքը: Հասարակական գիտությունների ամբիոնի վարիչ Նելլի Բաղդասարյանը մասնավորապես ընդգծել է, որ գործող ուսանողական խորհրդին բաժին ընկավ բարդագույն մի ժամանակահատված՝ 44-օրյա պատերազմից հետո, որին գումարվեց Արցախի հայաթափումը, և Պոլիտեխնիկի Ուսանողական խորհուրդը պատվով կատարեց իր առաքելությունը:
Փակ գաղտնի քվեարկությամբ, ձայների 58 կողմ և 2 դեմ հարաբերակցությամբ Ուսանողական խորհրդի նոր նախագահ ընտրվեց Տեղեկատվական և հաղորդակցական տեխնոլոգիաների ու էլեկտրոնիկայի ֆակուլտետի ուսանող Ալեն Գրիգորյանը։
Ընտրվել են նաև գիտական խորհրդի նոր ուսանող անդամներ։