Համաշխարհային օրացույցում փետրվարի 4-ը Քաղցկեղի դեմ պայքարի օրն է, հիշեցնում է ԵՊԲՀ-ն:
Արշավի նպատակն է միավորել անհատներին և պետություներին քաղցկեղի վերաբերյալ իրազեկվածությունը բարձրացնելու և համապատասխան քայլեր ձեռնարկելու գործում՝ կանխելով միլիոնավոր մահեր:
Այս տարվա միջոցառումների կարգախոսն է «Լրացնելով խնամքի բացը․ յուրաքանչյուր ոք արժանի է քաղցկեղի խնամքի հասանելիությանը»։
Ամբողջ աշխարհում, այդ թվում՝ Հայաստանում, քաղցկեղի խնդիրը շարունակում է հանրային առողջության լուրջ մարտահրավեր հանդիսանալ։
ԱՀԿ տվյալներով` աշխարհում տարեկան արձանագրվում է քաղցկեղի շուրջ 10-12 մլն նոր դեպք և շուրջ 9,6 մլն մահացության դեպք:
Հայաստանում տարեկան նոր դեպքերը միջինում 7700 են:
Վիճակագրական տվյալների վերլուծության համաձայն` տղամարդկանց շրջանում առավել տարածված են շնչափողի, բրոնխների, թոքի, լյարդի, միզապարկի և շագանակագեղձի, իսկ կանանց շրջանում` կրծքագեղձի, արգանդի մարմնի և վզիկի, իսկ վերջին տարիներին թե՛ տղամարդկանց, թե՛ կանանց շրջանում ստամոքսի և կոլոռեկտալ քաղցկեղների դեպքերի աճի միտում է գրանցվել:
Քաղցկեղի դեպքերի առնվազն մեկ երրորդը կանխարգելելի է: