«Քննական սթրես». առցանց հանդիպում ԵՊՀ-ում

ԵՊՀ փիլիսոփայության և հոգեբանության ֆակուլտետի անձի հոգեբանության ամբիոնը, հաշվի առնելով քննական շրջանի մոտալուտ սկիզբը և դրա հետ կապված հնարավոր բացասական ապրումներն ու զգացողությունները, նախաձեռնել և կազմակերպել է «Քննական սթրես» թեմայով առցանց հանդիպում։ Հանդիպմանը մասնակցել է 27 ուսանող ԵՊՀ տարբեր ֆակուլտետներից, տեղեկացնում են ԵՊՀ-ից։

Հանդիպումը վարել են ԵՊՀ «Անձի հոգեբանություն և հոգեբանական խորհրդատվություն» մագիստրոսական ծրագրի շրջանավարտներ Շուշաննա Հասասյանը և Վիկտորյա Ծատուրյանը:

Հանդիպման ընթացքում քննարկվել են մի շարք հարցեր՝ ինչ է սթրեսը, ինչպես է այն առաջանում, որոնք են քննական սթրեսի հետ կապված ապրումները, ինչպես կարելի է կառավարել այն, հատկապես ո՞ր ավտոմատ մտքերը և ո՞ր սովորություններն են նպաստում սթրեսի ապրմանն ու վերապրմանը քննություններին պատրաստվելիս և քննության ընթացքում:

Բանախոսները գործնական խորհուրդներ տվեցին, թե ինչպես կարելի է հաղթահարել սթրեսը և անհագստությունը, իսկ ուսանողները պատմեցին, թե իրենք ինչպես են հաղթահարում քննական շրջանում առաջ եկող անհանգստությունը:

Հետադարձ կապի միջոցով ուսանողների կողմից եղան դրական արձագանքներ և հետագա հանդիպումների թեմաների առաջարկներ:

Նշենք, որ Անձի հոգեբանության ամբիոնը վերջին մեկ տարում կազմակերպել է մի շարք վեբինարներ, որոնք նվիրված էին սթրեսի հաղթահարմանը և դիմակայունությանը՝ նպատակ ունենալով զարգացնելու հոգեկրթության գաղափարը և նպաստելու հոգեբանական գիտելիքի կիրառմանն այս դժվար ժամանակաշրջանում:

Առցանց հանդիպման համար ընտրվել է «Քննական սթրես» թեման, քանի որ շատ հոգեբանական բնույթի խնդիրներ կարող են խոչընդոտ դառնալ ակադեմիական առաջադիմության համար, իսկ այդ խնդիրների հաղթահարումը կհանգեցնի ուսանողների անձնային աճին՝ նպաստելով նաև նրանց մասնագիտական զարգացմանը:

Նախաձեռնությունը շարունակական է լինելու:

Լուսանկարում՝ քննություն ԱրՊՀ-ում