Հոկտեմբերի 17-ին Վանաձորի Հ. Թումանյանի անվան պետական համալսարանի Smart Caffe՛-ում տեղի ունեցավ հանդիպում ռեկտոր Ռուստամ Սահակյանի, դեկանների, կրթական գործընթացների կառավարման բաժնի ղեկավարի և համալսարանում ուսումնառությունը վերսկսած արցախցի 28 ուսանողների հետ:
Տեղեկությունը հայտնում են ՎՊՀ լրատվական ծառայությունից։
Հանդիպման գլխավոր նպատակը՝ ՀՀ կառավարության կողմից Լեռնային Ղարաբաղից բռնի տեղահանված ուսանողների ուսման վարձի լրիվ կամ մասնակի փոխհատուցման նպատակով կրթաթոշակի տրամադրման կարգին ծանոթացնելն էր:
Ռ. Սահակյանը ներկայացրեց նաև 2023-2024 ուստարվա ընթացքում արցախցի ուսանողների ընդունելության և ուսումնառության հետ կապված հարցերը, խոսեց քննություններին նրանց մասնակցությունն ապահովելու մասին: Ոլորտի պատասխանատուներն անդրադարձան նաև ուսանողների կողմից բարձրաձայնված հարցերին:
Հավելենք, որ Արցախից բռնի տեղահանված ուսանողների թիվը մոտ 4600 է։ Հոկտեմբերի 18-ի տվյալներով՝ նրանցից 1155-ն արդեն հաշվառվել է ՀՀ պետական բուհերում և դրանց մասնաճյուղերում, ավելի քան 1000-ը՝ քոլեջներում և ուսումնարաններում։