Սոֆիայում ընթացող ըմբշամարտի օլիմպիական վարկանիշային մրցաշարում հայ երկու ըմբիշ Տոկիո-2020-ի ուղեգիր են ապահովել, տեղեկացնում է armsport.am-ը։
Արմեն Մելիքյանը մեկնարկային գոտեմարտում 10:1 հաշվով հաղթել էր մեքսիկացի Սամուել Գուրիային, այնուհետև 9-0 հաշվով հաղթել էր լիտվացի Յուստաս Պետրյավիչուսին ու դուրս եկել քառորդ եզրափակիչ։ Այստեղ արդեն Մելիքյանը գոտեմարտել էր ռումինացի Ռազվան Արնաուտին ու հաղթել 3-1 հաշվով՝ դուրս գալով կիսաեզրափակիչ։
Մելիքյանը Սոֆիայի մրցաշարի ոսկե մեդալի համար կգոտեմարտի Մոլդովայի ներկայացուցիչ Վիկտոր Չիոբանուի հետ։
Իսկ 67 կգ քաշային Կարեն Ասլանյանը Տոկիոյի ամառային օլիմպիական խաղերի ուղեգիր է ապահովել՝ կիսաեզրափակչում 3-1 հաշվով ֆանտաստիկ հաղթանակ տանելով ֆրանսիացի Մամադասա Սիլայի նկատմամբ։ Ասլանյանը դուրս է եկել եզրափակիչ, որտեղ կգոտեմարտի կա՛մ ուկրաինացի, կա՛մ ճապոնացի ըմբիշի հետ։
Ալսանյանը պայքարը սկսել էր 1/8 եզրափակչից, որտեղ մրցել էր 2020թ․-ի Եվրոպայի չեմպիոն, նորվեգացի Մորտեն Տորեսենի հետ, ու 8-0 հաշվով հաղթանակ տարել՝ դուրս գալով քառորդ եզրափակիչ։ Այստեղ արդեն մեր ըմբիշը 10:5 հաշվով տպավորիչ հաղթանակ էր տարել Ղրղզստանի ներկայացուցիչ Ամանտուր Իսմայիլովի նկատմամբ և դուրս եկել կիսաեզրափակիչ։
Հունահռոմեական ոճի ըմբշամարտի Հայաստանի հավաքականը, հիշեցնենք, մրցաշարին ներկայացված է չորս մարզիկով։
Հայաստանն արդեն ամառային Օլիմպիական խաղերի 8 ուղեգիր ունի։
Comment here
Դուք պետք է մուտք գործեք՝ մեկնաբանությունը ուղարկելու համար։