Օգոստոսի 24-ին Հայաստանում կդիտվի 2026 թվականի ամենաշոգ օրը, ֆեյսբուքյան էջում գրել է Հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը։
«Հովտային շրջաններում օդի առավելագույն ջերմաստիճանը կհասնի +38…+40 աստիճանի»,- գրել է նա։
Հիդրոօդերևութաբանության և մոնիթորինգի կենտրոնն էլ հայտնում է, որ Իրաքի շրջաններից արևադարձային տաք օդի ալիք է ներթափանցելու, ինչով պայամանավորված՝ օդի ջերմաստիճանը հանրապետության ողջ տարածքում կբարձրանա:
«Օգոստոսի 23-24-ին օգոստոսի 21-ի հետ համեմատ ցերեկային ժամերին կբարձրանա 5-6 աստիճանով։ Ամենաբարձր ջերմաստիճանները կգրանցվեն օգոստոսի 24-ին լեռնային մարզերում՝ ցերեկը հասնելով +32…+33°C, նախալեռնային գոտում +36․․․+37°C, հովտային գոտում՝ հատկապես Երևանում, Արարատյան դաշտում և Սյունիքի հովիտներում +38․․․+40°C։ Օգոստոսի 26-ից սկսած տաք օդային հոսանքները աստիճանաբար կնահանջեն, և օդի ջերմաստիճանը կսկսի նվազել»,- ասված է հաղորդագրությունում։
Օգոստոսի 21-24-ին հանրապետության ողջ տարածքում սպասվում է առանց տեղումների եղանակ, 25-26-ին երեկոյան ժամերին առանձին շրջաններում կդիտվի կարճատև անձրև և ամպրոպ։
Մեր տելեգրամյան ալիքը՝ t.me/usanoghnews
