«Այբ»-ի «Կանաչ քիմիա» ակումբի բիոպլաստիկները գյուտի արտոնագիր են ստացել

«Այբ» դպրոցի նախագծային ուսումնառության «Կանաչ քիմիա» ակումբի աշակերտների գյուտը՝ բնության մեջ կենսաքայքայվող պոլիմերների ստեղծման եղանակը, ստացել է գյուտի արտոնագիր Մտավոր սեփականության գործակալության կողմից և հրապարակվել ՀՀ էկոնոմիկայի նախարարության պաշտոնական տեղեկագրում։

«Այբ»-ի «Կանաչ քիմիա» ակումբի աշակերտները ստեղծել են թերմոպլաստիկ օսլայի հումքով կենսաքայքայվող պլաստիկներ, որոնք կարող են փոխարինել նավթային հումքի վրա հիմնված առկա պլաստիկներին։ «Կանաչ քիմիա» ակումբը հետազոտություններն ու փորձերն ամբողջությամբ իրականացրել է «Այբ» դպրոցի քիմիայի լաբորատորիայում՝ ուսուցիչներ Լիլիթ Համբարձումյանի և Լևոն Սարգսյանի ղեկավարությամբ։

«Այբ»-ի աշակերտների ստեղծած բիոպլաստիկները կարող են էականորեն նվազեցնել բնության աղտոտումը միանգամյա օգտագործման պոլիէթիլենային պլաստիկներով։ Ներկա փուլում ակումբի անդամները, բիոպլաստիկների մշակման եղանակի համար գյուտի արտոնագիր ստանալուց հետո, ուսումնասիրում են դրանց արտադրական գործընթացը սկսելու հնարավորությունը, ինչի համար ստանում են բազմաթիվ բիզնես առաջարկներ։

«Կանաչ քիմիա» ակումբի այս նախագիծը հաղթել է «100 գաղափար Հայաստանի համար» ու Diamond Challenge Armenia մրցույթներում և ներկայացվել ԱՄՆ-ում՝ Diamond Challenge մրցույթի եզրափակիչում, ու Բրեմենում՝ Գյոթե-ինստիտուտի «Դպրոցը հանուն շրջակա միջավայրի» մրցույթում։

Նախագծային ուսումնառությունը (project-based learning) «Այբ» դպրոցում 2015 թ. ներդրված նորարարական կրթական մոդել է՝ հիմնված «սովորել անելով» սկզբունքի վրա։ Այն կառուցում է ուսումնառությունը նախագծերի շուրջ: Այս ծրագրի շրջանակում աշակերտները կազմում են թիմեր և իրականացնում մեծածավալ, երկարաժամկետ նախագծեր, որոնք ուղղված են իրական համայնքային խնդիրների լուծմանը։

Նախագծերի իրականացման արդյունքում զարգանում են աշակերտների մի շարք կարևորագույն հմտություններ, ինչպիսին են թիմային աշխատանքը, բիզնես մտածելակերպը, պատասխանատվությունը, աշխատանքի պլանավորումն ու բաշխումը, ժամանակի կառավարումը, առաջնահերթությունների կարգավորումը և այլն: