Հայաստանում նոր ռուսական դպրոցներ բացելու ուղղությամբ աշխատանքային խմբերը ձևավորված են, մի քանի հանդիպումներ են եղել հեռավար ձևաչափով։ Այս մասին հայտարարեց ԿԳՄՍ նախարար Ժաննա Անդրեասյանը «Գիտության, կրթության և արտադրության ինտեգրումը՝ տնտեսության արդիականացման շարժիչ ուժ» հայ-ռուսական գիտակրթական համաժողովի բացման ժամանակ՝ անդրադառնալով նախօրերին տարածված այն տեղեկությանը, թե Հայաստանում պատրաստվում են 4 նոր ռուսական դպրոց բացել։
Usanogh.am-ն արդեն հայտնել է, որ Ռուսաստանի լուսավորության փոխնախարար Դենիս Գրիբովի այն հայտարարության մասին, թե Ռուսաստանը ԱՊՀ երկրներում ռուսական դպրոցների կառուցման ծրագիր է իրականացնում։ Նախատեսվում է ռուսական 4 դպրոց բացել Հայաստանում։
Ժաննա Անդրեասյանի խոսքով՝ քննարկվում է հիմնականում երկու ուղղությամբ հարցեր՝ մեկն այն համագործակցությունն է, որ կարող է լինել օրենսդրության շրջանակում։
«Ես արդեն խոսել եմ հայ-չինական դպրոցի մասին, որը շատ լավ օրինակ է նման համագործակցության, մենք հնարավոր ենք համարում նմանատիպ համագործակցություն ՌԴ-ի հետ, և երկրորդ ուղղությունը ՌԴ քաղաքացիների, որոնք գտնվում են Հայաստանում, կրթական իրավունքի ապահովումն է, որը պատրաստ ենք ամեն կերպ կարգավորել»,-ասաց նախարարը։