2025 թվականի օգոստոսի 16-ին Լոռու մարզի Ալավերդի համայնքի Հագվի գյուղը կհյուրընկալի առաջին «Մոշի փառատոնը»։
Նախաձեռնության նպատակն է վերակենդանացնել համայնքի մշակութային և հասարակական կյանքը, խթանել տեղական ձեռնարկատիրությունը և ներկայացնել Լոռին որպես զարգացող զբոսաշրջային ուղղություն։
Փառատոնի հիմնական նպատակներն են՝
- Վերակենդանացնել Հագվի գյուղի մշակութային և հասարակական միջավայրը
- Լոռու մարզը ներկայացնել որպես տուրիստական գրավիչ և զարգացող ուղղություն
- Խթանել տեղական արտադրանքի ճանաչելիությունը և իրացումը
- Նպաստել երիտասարդների ներգրավվածությանն ու արտագաղթի նվազեցմանը
- Ստեղծել համագործակցության, համերաշխության և ստեղծարար ինքնաարտահայտման կայուն հարթակ
Նախաձեռնությունն արձագանք է մի շարք մարտահրավերների, այդ թվում՝
- Մշակութային ենթակառուցվածքների բացակայությանը և համայնքային պասիվությանը
- Տնտեսական ակտիվության ցածր մակարդակին և տեղական արտադրանքի իրացման դժվարություններին
- Երիտասարդների արտագաղթին՝ պայմանավորված զարգացման հստակ հեռանկարների բացակայությամբ
- Լոռու մարզի՝ որպես տուրիստական ուղղության, հանրապետական մակարդակում ցածր ճանաչելիությանը
«Մոշի փառատոնն» ունենալու է ոչ միայն մշակութային, այլև տնտեսական ազդեցություն՝ նպատակ ունենալով վերածվել համայնքային զարգացման մոդելի, որը հնարավոր է կիրառել նաև ՀՀ այլ մարզերում, վստահեցնում են կազմակերպիչները։
