Երեւանի պետական համալսարանի արեւելագիտության ֆակուլտետի թյուրքագիտության բաժնի երրորդ կուրսի ուսանողները ՀՀ գլխավոր դատախազ Արթուր Դավթյանից պահանջել են ազատ արձակել իրենց կուրսընկերոջը՝ Տարոն Մանուկյանին, գրում է yerkir.am-ը:
Գլխավոր դատախազին հասցեագրված բաց նամակում ուսանողները նշել են.
«Մեր կուրսընկեր Տարոն Մանուկյանը, որը նաեւ 44-օրյա պատերազմին մասնակցել է մինչեւ վերջին օրը, այժմ կալանավորված է եւ գտնվում է Արթիկի քրեակատարողական հիմնարկում:
Տարոնը հայրենասեր է, իսկական ընկեր: Տարոնը դարձել է ստոր սադրանքի զոհ: Մի քանի տարեց քաղաքացիներ Տարոնին եւ նրա ընկերներին խփել են հավկիթներով, հայհոյել իրենց, իրենց ընտանիքներն ու հայ ժողովրդին: Տարոնի նյարդերը տեղի են տվել, եւ նա փորձել է սաստել սադրիչներին:
Դուք իրավասու եք միջնորդել, որ մեր ընկերոջ, իսկական հայրենասեր Տարոն Մանուկյանի խափանման միջոցը փոխվի: Եթե Տարոնը կալանավորված է, ապա կալանավորված ենք նաեւ մենք՝ նրա կուրսընկերները:
Եթե միջոց չեք ձեռնարկում ազատելու Տարոն Մանուկյանին, ապա կարող եք մեզ եւս տեղափոխել «Արթիկ» քրեակատարողական հիմնարկ»:
Բաց նամակն այսօր ուսանողները հանձնել են նաեւ ՀՀ գլխավոր դատախազություն:
Նշենք, որ մայիսի 8-ին ընդդիմության կողմից կազմակերպած ավտոերթի ընթացքում, Գյումրի քաղաքի Երևանյան խճուղում կանգնած քաղաքացիների և հիշյալ ավտոերթի մասնակիցների միջև տեղի է ունեցել վիճաբանություն։
ՀՀ գլխավոր դատախազությունը մայիսի 13-ին տարածած հաղորդագրության մեջ հայտնել էր, որ նշված գործով մեղադրանք է առաջադրվել 7 անձի։
Նրանցից 4-ը կալանավորվել են, այդ թվում՝ Տարոն Մանուկյանը։
