Ճարտարապետության և շինարարության Հայաստանի ազգային համալսարանի (ՃՇՀԱՀ) բակալավրիատ ընդունված առկա ուսուցմամբ առաջին կուրսեցիների համար Հայ օգնության ֆոնդը (ՀՕՖ) «Ժիրայր Նիշանյան հիմնադրամի կրթավճար» ծրագրի շրջանակում հայտարարում է կրթավճարի մրցույթ:
Մրցույթին կարող են մասնակցել այն ուսանողները, որոնք.
ա) ընդունվել են Ճարտարապետության և շինարարության Հայաստանի ազգային համալսարանի՝ ճարտարապետության, դիզայնի, արդյունաբերական և քաղաքացիական շինարարության ֆակուլտետների առկա ուսուցմամբ առաջին կուրս,
բ) ունեցել են բարձր առաջադիմություն դպրոցում, միասնական և բուհի քննությունները հանձնել են գերազանց կամ լավ գնահատականներով,
գ) սոցիալապես անապահով ընտանիքներից են:
Ըստ «Ժիրայր Նիշանյան հիմնադրամի կրթավճար» ծրագրի մրցույթին մասնակցելու կարգի՝ վերոհիշյալ պայմաններին համապատասխանող ՃՇՀԱՀ ուսանողները պետք է 2021 թ. օգոստոսի 1-15-ը ներառյալ Երևանի Մովսես Խորենացի 22 հասցեում գտնվող ՀՕՖ-ի Հայաստանի մասնաճյուղ ներկայացնեն կամ նշված էլ․ փոստով (edik.karapetyan@far.am, mane.khachatryan@far.am) ուղարկեն հետևյալ փաստաթղթերը.
• դիմում (ձևը հայտարարությանը կից ներկայացված է, կարող եք ստանալ՝ նաև դիմելով վերոհիշհալ հասցեներով կամ ՀՕՖ-ի ֆեյսբուքյան էջին (Fund for Armenian relief),
• անձնագրի պատճեն,
• 1 լուսանկար (3×4 սմ չափսի),
• միջնակարգ կրթության վկայականի պատճեն,
• բուհ ընդունվելու մասին հանրապետական ընդունող հանձնաժողովի կողմից հաստատված ցուցակի պատճեն,
• միասնական և բուհում հանձնած քննությունների գնահատականների մասին տեղեկանք,
• ընտանիքի անապահովության միավորի մասին տեղեկանք (առկայության դեպքում),
• տեղեկանք ծնողների աշխատավայրից՝ նրանց աշխատանքի և աշխատավարձի վերաբերյալ։ Եթե չեն աշխատում՝ տեղեկանք զբաղվածության տարածքային կենտրոնից կամ աշխատանքային գրքույկի պատճեն՝ պարզաբանումով՝ ներկա զբաղվածության կամ չաշխատելու պատճառի մասին։
• հակիրճ ինքնակենսագրություն՝ նշելով, թե ինչու եք դիմել տվյալ ծրագրին:
Թերի փաստաթղթերը չեն դիտարկվի:
Շահառուների ընտրությունը տեղի է ունենալու 2 փուլով՝
• ներկայացված փաստաթղթերի քննում,
• առցանց հարցազրույցի անցկացում դիմումատուի և ընտանիքի անդամների ներկայությամբ:
Ծրագրում ուսանողի ընդգրկման որոշումը կայացնելու է ՀՕՖ-ի կրթական ծրագրերի հանձնաժողովը օգոստոսի 24-31ը :
Լրացուցիչ տեղեկությունների համար կարող եք զանգահարել 060526660 հեռախոսահամարով:
Comment here
Դուք պետք է մուտք գործեք՝ մեկնաբանությունը ուղարկելու համար։