«Հասարակագիտություն» առարկան, ըստ առաջարկվող նոր նախագծի, ուսումնասիրվելու է 7-12-րդ դասարաններում։ Առարկայի բովանդակության մեջ ներառված են սոցիոլոգիան, հոգեբանությունը, իրավագիտությունը, տնտեսագիտությունը, քաղաքագիտությունը, փիլիսոփայությունը։ Առարկայի ուսուցումն իրականացվելու է պարուրաձև սկզբունքով, ինչը նշանակում է, որ ամեն տարի ծրագրում ներառված են լինելու 6 գիտակարգերին վերաբերող թեմաներ։ Առարկայի հիմնական գաղափարներն են՝
• անհատ,
• հասարակություն,
• արժեքներ,
• մարդկության գլոբալ հիմնախնդիրներ։
Առարկայի բովանդակությունը ներառելու է Հայաստանում արդիական թեմաներ։ Հաշվի առնելով այն հանգամանքը, որ հասարակագիտության մեջ նույն հարցի մասին կարող են լինել տարբեր մոտեցումներ, հիմնական շեշտը դրվելու է հասկացությունների ուսուցման պատմական մոտեցման վրա։ Դա հնարավորություն է տալու ամբողջական պատկերացում կազմել տվյալ հասկացության ծագման և պատմական զարգացման վերաբերյալ։ Մեծ կարևորություն է տրվելու միջառարկայական կապերի ապահովմանը։ Սովորողների քննադատական և ստեղծագործական մտածողությունը զարգացնելու նպատակով թեմաները ներկայացվելու են համակողմանիորեն, ինչը հնարավորություն է տալու նրանց գործնականում կիրառել մտածողության այդ տեսակները։
Առարկայի բովանդակության առանցքում լինելու են գրագիտության նոր բաղադրիչները՝ քաղաքացիական, ֆինանսական, մեդիա։ Առարկան դասավանդվելու է հետևյալ 3 մոտեցմամբ՝
• Հասկացությունների և սկզբունքների ուսուցում, ինչը հնարավորություն կտա ընկալել առարկայի բովանդակությունը։
• Հետազոտական ուսուցում, ինչը թույլ կտա հասկանալ, որ բազմաթիվ խնդիրներ չունեն միանշանակ լուծումներ, և անխուսափելի են մշտական որոնումները։ Սրա շնորհիվ հնարավոր կլինի կիրառել ձեռքբերված գիտելիքները։
• Նախագծային ուսուցում, ինչը նպատակ ունի զարգացնել թիմային աշխատանքի կարողություններ, առաջարկել խնդիրների լուծման այլընտրանքային տարբերակներ, ձեռք բերել գիտելիքի կիրառման հմտություններ։
Comment here
Դուք պետք է մուտք գործեք՝ մեկնաբանությունը ուղարկելու համար։