Հուլիսի 24-ին Մայր աթոռի Արտաքին հարաբերությունների և արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը Մայր աթոռում ընդունեց Հայկական բարեգործական ընդհանուր միության (ՀԲԸՄ) Սիրիայի, Արգենտինայի և Երևանի «Անդրանիկ սկաուտական բանակումի» շուրջ 90 մասնակիցներին։
Սրբազան Հայրը, պատանի և երիտասարդ հայորդիներին փոխանցելով Ամենայն հայոց կաթողիկոս Գարեգին Երկրորդի հայրական օրհնությունն ու բարեմաղթանքները, կարևորեց սկաուտական բանակումի մասնակիցների այցը Հայաստան և Մայր Աթոռ Սուրբ էջմիածին, ինչը լավագույն առիթ է զորացնելու նրանց ազգային-հոգևոր նկարագիրը և սերը հայրենիքի նկատմամբ։
Նաթան արքեպիսկոպոսը պատգամեց հայորդիներին նախանձախնդրորեն պահել և պահպանել իրենց ազգային ինքնությունն ու արժեքները, ամրապնդել կապը Հայոց եկեղեցու հետ և ջանքեր գործադրել օգատկարություն բերելու հայրենիքի պայծառությանն ու առաջընթացին։
