Արցախում Ադրբեջանի ագրեսիայի հետևանքով ադրբեջանական կողմն ունի 192 զոհ, որոնք ՊՆ զինծառայողներ են, հայտնում են ադրբեջանական լրատվամիջոցները՝ հղում անելով երկրի առողջապահության նախարարությանը։
Ըստ Ադրբեջանի պաշտոնական տվյալների՝ զոհվել է 1 քաղաքացիական անձ։ Վիրավորվել է 511 զինծառայող և մեկ քաղաքացիական անձ։
Հիշեցնենք, որ Ադրբեջանը սեպտեմբերի 19-ին Արցախի դեմ լայնամասշտաբ հարձակում սկսեց՝ ամբողջությամբ զանգվածային հրետակոծության տակ առնելով Արցախը, այդ թվում՝ Ստեփանակերտը։
Այս պահին հայտնի է հայկական կողմից առնվազն 200 զոհի և 400 վիրավորի մասին։
Սեպտեմբերի 20–ին հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը:
Սեպտեմբերի 21–ին ՌԴ խաղաղապահների միջնորդությամբ ադրբեջանական Եվլախում կայացավ Արցախի ու Ադրբեջանի ներկայացուցիչների հանդիպումը։ Սեպտեմբերի 25–ին Իվանյանում կայացավ երկրորդ հանդիպումը։
Սեպտեմբերի 21-ի առավոտվա դրությամբ քաղաքներից ու գյուղերից սկսվեց բնակիչների տարհանումը։
Արդեն մի քանի օր է՝ Արցախից բռնագաղթվածները ժամանում են Գորիս ու Կոռնիձոր (Հումանիտար կայան)։
Սեպտեմբերի 26-ին Վայոց Ձորի մարզում՝ Վայքում, բացվել է Արցախից տեղահանված անձանց ընդունելության 2-րդ կենտրոնը։
Սեպտեմբերի 27-ժամը 12։00–ի դրությամբ 47 115 մարդ է անցել Հակարիի կամրջով՝ Արցախից Հայաստանի Հանրապետություն։
