Usanogh.am-ը հավաքագրել է անվճար կրթական ծրագրեր, դասապատրաստում մատուցող ուսումնական կենտրոնների, տարբեր կազմակերպությունների, ընկերությունների տվյալներ, որոնք պատրաստ են աջակցել Արցախից բռնի տեղահանված մեր հայրենակիցներին, իսկ որոշները նաև` ապահովել աշխատանքով:
«Տոնուս-Լես Ռեմեդի» դեղատնային ցանցը պատրաստ է անցկացնել անվճար ուսուցում և պրակտիկա դեղագիտության կամ դեղագործության ոլորտի մասնագետների համար:
«Անվիռա տուրը» պատրաստ է անցկացնել անվճար ուսուցում և թրեյնինգներ` տուրիզմի ոլորտում: Ուսուցումից հետո հնարավոր կլինի աշխատանքի անցնել կազմակերպությունում:
«Root Media»-ն պատրաստ է անվճար մարքետինգային դասընթացներ իրականացնել արցախցիների համար: Մեծ մասը կարող են նաև իրենց մոտ աշխատանք գտնել:
«Մալիմա» դասապատրաստման և զարգացման կենտրոնը պատրաստ է արցախցիներին ապահովել աշխատանքով, իսկ երեխաների համար կազմակերպել անվճար և խորացված ուսուցում:
«Սաղմոս Կերամիկա»-ն պատրաստ է արցախցիների համար կազմակերպել կավագործության և բիզնես հմտության դասընթացներ: «H2O»-ի թիմն էլ կազմակերպում է մատնահարդարման բազային անվճար դասընթացներ Արցախից տեղափոխված կանանց համար: Դասընթացն ավարտածները կապահովվեն աշխատանքով:
«Ssb academy»-ն էլ հայտնում է, որ Արցախի մեր հայրենակիցները հնարավորություն կունենան անվճար ուսումնասիրելու բիզնես հմտություններ: «Մաթեմիկ ՀԿ»-ն էլ վերջին մի քանի տարում զբաղվում է Արցախի երեխաների համար անվճար դասընթացների կազմակերպմամբ:
Սեպտեմբերի 25-ին ժամը 17:00 դրությամբ Լեռնային Ղարաբաղից Հայաստան մուտք է գործել բռնի տեղահանված 6650 անձ։
Հիշեցնենք, որ Ադրբեջանը սեպտեմբերի 19-ին Արցախի դեմ լայնամասշտաբ հարձակում է սկսել՝ ամբողջությամբ զանգվածային հրետակոծության տակ առնելով Արցախը, այդ թվում՝ Ստեփանակերտը։