Երևանի պետական համալսարանում անցկացվում է «COST-UniDive» ձմեռային երկրորդ դպրոցը, որը կազմակերպվել է ԵՊՀ «Հայերենի լեզվական տեխնոլոգիաների հետազոտական աշխատարան» պետական նպատակային ծրագրի հետազոտողների նախաձեռնությամբ՝ ՀՀ ԿԳՄՍՆ լեզվի կոմիտեի երաշխավորությամբ ու բարձրագույն կրթության և գիտության կոմիտեի նույնանուն գիտական և գիտատեխնիկական պետական նպատակային ծրագրի շրջանակում։
Ձմեռային դպրոցը համախմբել է շուրջ 20 երկրների 60 մասնակիցների և ներառում է երեք աշխատաժողով, որոնց ընթացքում քննարկվում են լեզվական բազմազանության հիմնախնդիրները, ինչպես նաև այն, թե որքանով են լեզվական տեխնոլոգիաները հնարավորություն տալիս նկարագրելու և ներառելու աշխարհի լեզուների ողջ բազմազանությունը առօրյա կյանքում և արհեստական բանականության գործիքներում։
Գործընկերության շրջանակում ԵՊՀ-ում հյուրընկալվել են նաև «COST-UniDive» նախագծի՝ բնական լեզվի մշակման ոլորտում մասնագիտացած շուրջ 20 հետազոտողներ Եվրոպայի առաջատար համալսարաններից։ Մասնակիցները ներկայացնում են Սակլե (Փարիզ), Կարլի (Պրահա), Ուփսալայի (Շվեդիա), Սաարլանդի (Գերմանիա), Հայդելբերգի (Գերմանիա) համալսարանները և գիտակրթական հեղինակավոր այլ հաստատություններ։
ՀՀ ԿԳՄՍՆ լեզվի կոմիտեի նախագահ Սիրանուշ Դվոյանը, անդրադառնալով նախաձեռնության կարևորությանը, նշեց. «Առաջիկա օրերին շուրջ 60 մասնակիցներ հնարավորություն կունենան քննարկելու լեզվական բազմազանությանը վերաբերող հարցերը տեխնոլոգիական արդի զարգացումների համատեքստում։ Քննարկումների առանցքային հարցն այն է, թե ինչպես են լեզվական տեխնոլոգիաներն աշխատում լեզվական բազմազանության հետ՝ ընդգրկվելով արդեն մեր առօրյայի մաս դարձած արհեստական բանականության ոլորտում»։
Ըստ Լեզվի կոմիտեի նախագահի՝ մասնագետների համար սա տեխնոլոգիաների զարգացման խնդիր է, իսկ այն մարդկանց համար, որոնք ամեն օր տարբեր նպատակներով օգտվում են արհեստական բանականության գործիքներից, լեզվական տեխնոլոգիաների զարգացումը հաճախ ընկալվում է որպես աներևակայելի «հրաշքների աշխարհ»։
«Դժվար է հավատալ, սակայն լեզվական տեխնոլոգիաներն արդեն փոխել են և շարունակում են փոխել մեր պատկերացումները աշխարհի, լեզուների և դրանց փոխհարաբերությունների մասին։ Այդ փոփոխությունները հնարավոր են դառնում այստեղ հավաքված մասնագետների ամենօրյա համբերատար աշխատանքի և սերտ համագործակցության շնորհիվ»,- ընդգծեց նա։
Սիրանուշ Դվոյանը առանձնահատուկ կարևորեց ԵՊՀ-ում գործող «Հայերենի լեզվական տեխնոլոգիաների հետազոտական աշխատարան» ծրագրի հետազոտական թիմի աշխատանքը, ինչպես նաև ԵՄ գիտության և տեխնոլոգիաների եվրոպական համագործակցության ասոցիացիայի («European Cooperation in Science and Technology», «COST») ներդրած ջանքերը՝ նախաձեռնության իրականացման համար։ Նրա խոսքով՝ սա վառ օրինակ է, թե ինչպես ԵՊՀ ինտեգրումը եվրոպական հետազոտական ենթակառուցվածքներին և նախագծերին կարող է խթանել թվանշային հումանիտար գիտությունների կայացումը և զարգացումը Հայաստանում։
Ձմեռային դպրոցը նաև բուհի, հետազոտական խմբերի, թիրախային գիտական նախագծերի և պետական գերատեսչությունների արդյունավետ գործակցության օրինակ է։ Գործընկերային այսօրինակ մոդելը կարևոր դերակատարում ունի լեզվական թվանշային ենթակառուցվածքների ձևավորման, լեզվական թվանշային էկոհամակարգի զարգացման, ինչպես նաև հայերենի լեզվական տեխնոլոգիաների առաջմղման գործում՝ ՀՀ լեզվաքաղաքական առաջնահերթությունների շրջանակում։
Հավելենք, որ ձմեռային դպրոցը կշարունակվի մինչև հունվարի 24-ը:
Մեր տելեգրամյան ալիքը՝ t.me/usanoghnews
