Իրավապաշտպան մի շարք կազմակերպություններ մարտի 10-ին Գերմանիայի մայրաքաղաք Բեռլինի Բրանդենբուրգյան դարպասների մոտ բողոքի ակցիա են անցկացել՝ պահանջելով ԵՄ-ից, Գերմանիայից ու Ֆրանսիայից քայլեր ձեռնարկել ու ճնշում գործադրել Ադրբեջանի վրա՝ բոլոր հայ գերիներին անհապաղ ազատելու համար։
Պահանջներից մեկն էլ վերաբերում է արցախցիների՝ հայրենիք անվտանգ վերադարձի համար պայմաններ ստեղծելուն։
Բողոքի ակցիայի կազմակերպիչներից են Zentralrat der Armenier in Deutschland e.V.-ը, GfbV-ն, Theophanu Club German-ը, «Ցեղասպանության ճանաչում» աշխատանքային խումբը, «Ազատ արձակեք հայ պատանդներին» կազմակերպությունը։
Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:
Նախկին պետնախարար և բարերար Ռուբեն Վարդանյանի գործը քննվում է առանձին վարույթով:
Փետրվարի 26-ին, հայտնի դարձավ, որ Ռուբեն Վարդանյանի առողջական վիճակը կտրուկ վատացել է, քանի որ նա ադրբեջանական բանտում փետրվարի 19–ից հացադուլ է սկսել։
Հավելենք, որ ըստ պաշտոնական տվյալների՝ Բաքվում 23 հայ գերի կա։
