Մանկավարժական համալսարանում մեկնարկել է ավարտական դիպլոմների հանձնման գործընթացը: Փոխադարձ շնորհավորանքներ, մաղթանքներ, բարձր տրամադրություն, երախտագիտության խոսքեր. բուհի 10 ֆակուլտետում շրջանավարտներին ճանապարհելու համար տարբեր կերպ էին պատրաստվել` հակահամաճարակային կանոնների պարտադիր պահպանմամբ:
2020-2021 ուսումնական տարում առկա և հեռակա ուսուցման համակարգում Մանկավարժական համալսարանն ունեցավ 1951 շրջանավարտ, 1482` բակալավրիատի, 469՝ մագիստրոսի կրթական աստիճանով: Բակալավրիատի 193 և մագիստրատուրայի 197 շրջանավարտ ստացավ գերազանցության դիպլոմ:
Շրջանավարտներին շնորհավորեցին և բարի երթ մաղթեցին ֆակուլտետների դեկանները, պրոֆեսորադասախոսական կազմը: Բակալավրիատի շրջանավարտներին նրանք խորհուրդ տվեցին ուսումը շարունակել նաև մագիստրատուրայում՝ վստահեցնելով, որ այդ ընթացքում կամրապնդվեն ձեռք բերված կարողությունները, կխորացվեն մասնագիտական հմտությունները՝ գրանցելով գիտական նոր ձեռբերումներ մանկավարժության և այլ ոլորտներում:
Մագիստրոսներին էլ խորհուրդ տվեցին ամուր պահել կապը հարազատ կրթօջախի հետ, մշտապես խորհրդակցել դասախոսների հետ և զարգացնել մասնագիտական գիտելիքները:
Շրջանավարտները շնորհակալություն հայտնեցին հարազատ բուհին` իրենց գիտելիքներով, մարդկային և մասնագիտական որակներով իրենց զինելու համար:
Comment here
Դուք պետք է մուտք գործեք՝ մեկնաբանությունը ուղարկելու համար։