Կալիֆոռնիայի տեխնոլոգիական ինստիտուտ (Կալտեխ)

Կալիֆոռնիայի տեխնոլոգիական ինստիտուտը  (California Institute of Technology; կրճատ՝ Caltech)  մասնավոր գիտահետազոտական ինստիտուտ է Փասադենայում (Կալիֆոռնիա, ԱՄՆ)։ Աշխարհի առաջատար բուհերից է, ԱՄՆ-ի՝ ճշգրիտ գիտությունների եւ ճարտարագիտության մեջ մասնագիտացած երկրորդ առաջատար բուհը Մասաչուսեթսի տեխնոլոգիական ինստիտուտի հետ։

Աշխարհի լավագույն բուհերի առաջին տասնյակում է։

Կալտեխը հայտնի է նաեւ ռեակտիվ շարժման լաբորատորիայով, որն արձակում է ԱՄՆ տիեզերագիտության կենտրոնի՝ ՆԱՍԱ-ի ավտոմատ տիեզերական սարքավորումների մեծ մասը։

Բուհն ունի գիտական և տեխնիկական ուղղվածությամբ վեց ակադեմիական բաժանմունք։

Հիմնադրվել է 1891 թվականին գործարար եւ քաղաքական գործիչ Էյմոս Թրուփի կողմից եւ կոչվել է նրա անունով։ Մի քանի անվանափոխումից հետո 1920-ին (այլ տվյալներով՝ 1921)  անվանվել է Կալիֆոռնիայի տեխնոլոգիական ինստիտուտ։

Ուսանողների թիվը համեմատաբար քիչ է՝ մոտ 2200, որից 1200՝ ասպիրանտ։ Դասախոսների թիվը մոտավորապես 800 է։

Կալտեխ ընդունվելու համար պետք է.

-հանձնել TOEFL,

-բակալավրիատի համար՝ հանձնել SAT, մաթեմատիկայի 2-րդ աստիճանի քննություն, ինչպես նաեւ պրոֆիլային քննություն մոլեկուլյար բնագիտություն, քիմիա, ֆիզիկա կամ բնապահպանություն առարկաներից։

-ներկայացնել 3 երաշխավորական նամակ, որոնցից մեկը՝ մաթեմատիկայի ուսուցչից, մեկը՝ հումանիտար առարկայի ուսուցչից։

-մագիստրատուրա ընդունվելու համար հարկավոր է հանձնել GRE։

Առաջին կուրսեցիներից պահանջվում է նաեւ խնամակալների կամ ծնողների կողմից հարկերը վճարելու վերաբերյալ տեղեկանք։

Հայտերը կարելի է ներկայացնել այստեղ։

Կեցության ծախսերը՝ ամսական 800-1500 դոլար։

Ուսման վարձը՝ տարեկան 48 000 դոլար։

Հասցեն՝ 1200 E California Blvd, Pasadena, CA 91125, USA

Կայքը՝ https://www.caltech.edu