Ուտելուց մեկ ժամ անց մեկ գավաթ սուրճն օգտակար է օրգանիզմի համար, մինչդեռ առավոտյան քաղցած այն խմելը լավագույն տարբերակը չէ։ KP.Ru-ի հետ հարցազրույցում նման կարծիք է հայտնել սրտաբան Վլադիմիր Բեկետովը, հայտնում է Sputnik Արմենիան։
Նրա խոսքով՝ որակյալ սուրճի չափաբաժինը ուտելուց մեկ ժամ անց «շատ օգտակար է, քանի որ օգնում է աղեստամոքսային տրակտով, այսպես ասած, առաջ մղել սնունդը»։
«Նյարդային համակարգի համար օգտակարության տեսանկյունից առավոտյան սուրճն ուղղակի անօգուտ է, իսկ երբեմն էլ՝ վնասակար», — նշել է բժիշկը։
Ըստ նրա՝ գիշերային հանգստից հետո նյարդային և սրտանոթային համակարգի համար նման խթանիչ պետք չէ:
«Մենք մեզ խթանում ենք մի բաժակ սուրճով և վազում ենք աշխատանքի։ Ինչ է տեղի ունենում ՝ ռեսուրսներն ավելի արագ են սպառվում»,- բացատրել է սրտաբանը։
Նա ևս մեկ անգամ ընդգծել է, որ ուտելուց (ճաշից մեկ — երկու ժամ հետո) սուրճն օգտագործելով՝ մենք օգնում ենք մարսողությանը։
Ըստ բժշկի՝ մեկ բաժակ սուրճը ժամը 16-ից, նույնիսկ 17 ժամից հետո ավելի նախընտրելի է, քան առավոտյան:
Մասնագետը նաև շեշտել է, թե չարժե սննդարար ճաշից հետո խմել էսպրեսսո կամ դրա հիման վրա պատրաստված ըմպելիքներ։ Սուրճը կարող է առաջացնել կերակրափողի ավելցուկային թուլացում և նույնիսկ գաստրոէնտերոլոգիական հիվանդության առաջացման պատճառ դառնալ։
Նա նաև ցրել է առասպելն այն մասին, թե սուրճը վնասակար է սրտանոթային համակարգի հիվանդություններով տառապող մարդկանց համար։ Նա խորհուրդ է տալիս սուրճից հրաժարվել նրանցք, ովքեր ունեն,օրինակ, թրթռացող առիթմիա։ Նաև խորհուրդ չի տալիս սուրճ օգտագործել մինչև 16 տարեկան երեխաներին, հղիության առաջին և երկրորդ եռամսյակում գտնվող կանանց։ Նրա կարծիքով՝ մնացած բոլոր մարդիկ կարող են սուրճ օգտագործել՝ չանցնելով օրական 2-3 չափաբաժնի սահմանը։
