ԳլխավորԼուր

«Թատրոն Կայարան»-ում կայացել է «Անահիտ»-ի առաջնախաղը

«Թատրոն Կայարան»-ում հոկտեմբերի 28-ին տեղի ունեցավ Ղազարոս Աղայանի «Անահիտ» հեքիաթի համանուն բեմադրության առաջնախաղը, որը անցավ լեփ-լեցուն դահլիճում: Ներկա էին տարբեր տարիքի հանդիսատեսներ, ովքեր մեծ ոգևորությամբ ընդունեցին հայկական գունեղ կոլորիտով երաժշտական ներկայացումը:

Պիեսի հեղինակը և բեմադրիչը «Թատրոն Կայարան»-ի գեղարվեստական ղեկավար Կարապետ Քարաջյանն է: Նա պիեսի հիմքում  դրել է 5 կետեր՝ սեր ծնողի, հայրենիքի,  կողակցի, աշխատանքի նկատմամբ ու հարգանքը:

Ներկայացման երաժշտությունը գրել է կոմպոզիտոր Վահե Հայրապետյանը, պարերը բեմադրել է Նակա Միրզոյանը, իսկ նկարիչն Արեգ Միրիջանյանն է:

Թատրոնի փոխտնօրեն Անդրանիկ (Անդի) Սողոմոնյանը Usanogh.am-ին տեղեկացրեց, որ ծավալուն աշխատանք է կատարվել ամեն մի դետալի, դեկորի, ընդհանուր ռեկվիզիտների, հագուստների, լույսերի և այլնի համար:

Ա.Սողոմոնյանը նշեց, որ շատ պատասխանատու աշխատանքը Կարապետ Քարաջյանի ղեկավարությամբ փայլուն արդյունք է տվել։ Դրա վառ ապացույցն էին հանդիսատեսների չդադարող ծափերը:

Փոխտնօրենը նշեց, որ առաջնախաղի բեմադրությանն իրենց աջակցել է Ararat view Garden-ի տնօրինությունը, որպեսզի ներկայացմանը մասնակից լինեն նաև պատերազմում զոհված ազատամարտիկների ընտանիքների անդամներ: