ԳլխավորԼուրԿրթություն

Բուհ ընդունվելու համար «Հայոց լեզու» առարկայի քննությունը պարտադիր է

«Բարձրագույն կրթության եւ գիտության մասին» եւ 22 այլ օրենքներում լրացումներ եւ փոփոխություններ նախատեսող օրինագծերի փաթեթով գործադիրն առաջարկում է սահմանել բարձրագույն ուսումնական հաստատություններին եւ գիտական կազմակերպություններին պետական աջակցության տրամադրման սկզբունքները, մեխանիզմները:

Փետրվարի 5-ին նախաձեռնությունն առաջին ընթերցմամբ քննարկվեց ՀՀ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նիստում՝ Մխիթար Հայրապետյանի նախագահությամբ, տեղեկացնում են ԱԺ լրատվական ծառայությունից։ Փաթեթը ներկայացրեց ՀՀ ԿԳՄՍ նախարար Վահրամ Դումանյանը:

Ըստ զեկուցողի՝ անհրաժեշտ հիմքեր են դրվում գիտահետազոտական կազմակերպությունների եւ բարձրագույն ուսումնական հաստատությունների համագործակցության եւ աստիճանական ինտեգրման համար:

Ասպիրանտական ծրագրերը կհամապատասխանեցվեն համաեվրոպական չափանիշներին՝ դրանք ընդգրկելով բարձրագույն կրթության համակարգում որպես որակավորման երրորդ աստիճան, որի ավարտին կշնորհվի դոկտորի (PhD) որակավորում:

Բարձրագույն կրթության հիմնական կրթական ծրագրերը, ըստ կրթական մակարդակների, կարող են իրականացվել ուսանողի լրիվ կամ մասնակի բեռնվածությամբ, այդ թվում՝ հեռավար ուսուցմամբ:

Ուսանողները կկարգավորեն իրենց ուսումնառության ինտենսիվությունը՝ պայմանավորված իրենց ընդունակություններով, զբաղվածության աստիճանով եւ ֆինանսական հնարավորություններով:

Երկու եւ ավելի բուհեր (այդ թվում՝ օտարերկրյա) կարող են համատեղ մշակել եւ իրականացնել կրթական ծրագիր եւ շնորհել բարձրագույն կրթության այս կամ այն մակարդակի որակավորում: Առանձին դասընթացներ կամ դասընթացների առանձին թեմաներ, ուսումնական մոդուլներ եւ կրթական ծրագրեր կարող են դասավանդվել օտար լեզվով, ինչը կնպաստի բարձրագույն կրթության միջազգայնացմանը:

Պետբյուջեից ֆինանսավորվող կրթաթոշակային տեղերը կբաշխվեն ոչ թե ըստ բուհերի, այլ ըստ ակադեմիական ոլորտների:

Բուհի ընդունելության մուտքային պահանջները բավարարող եւ սահմանված քննական առարկաներից վկայագիր ունեցող անձինք կարող են մասնակցել բուհերի ընդունելության մրցույթին: Պետական բյուջեի ֆինանսավորմամբ մի քանի կրթական ծրագրերի կամ տարբեր բուհերի նույն ակադեմիական ոլորտի կրթական ծրագրով սովորելու իրավունք ստացած դիմորդները կարող են ընտրել մեկ բուհ, որում ցանկանում են ստանալ բարձրագույն կրթություն:

Բակալավրի որակավորման աստիճանի ցանկացած կրթական ծրագրով ՀՀ քաղաքացիների՝ բուհ ընդունվելու համար սահմանվում է «Հայոց լեզու» առարկայի պարտադիր քննությունը:

Կառավարման արդյունավետությունը բարձրացնելու նպատակով բուհերի կառավարման խորհրդի կազմը կսահմանափակվի  9 անդամով: Կարգելվի պետական կամ քաղաքական պաշտոն զբաղեցնող անձանց անդամությունը:

Նիստի ընթացքում որոշ հարցերի վերաբերյալ պատգամավորները ներկայացրեցին առաջարկներ, որոնք հաշվի կառնվեն հեղինակների կողմից առաջինից երկրորդ ընթերցում ընկած ժամանակահատվածում:

Փաթեթը ստացավ դրական եզրակացություն:

Հավելենք, որ «Բարձրագույն կրթության եւ գիտության մասին» օրենքում փոփոխություններ կատարելու նախագծին ավելի վաղ դեմ են արտահայտվել ՀՀ մի շարք բուհեր ու գիտական շրջանակի ներկայացուցիչներ, այդ թվում՝ Երեւանի պետական համալսարանի դեկաններ և ստորաբաժանումների ղեկավարներ։

Comment here