ԳԹԿ փոխտնօրենը օրինակներով պարզաբանել է բարձր բալերով դիմորդների դուրս մնալու պատճառը

Բարձրագույն ուսումնական հաստատությունների ընդունելության կարգից դժգոհ դիմորդներն ու նրանց ծնողները բողոքի ակցիա են իրականացրել ԳԹԿ շենքի մոտ։

Նրանք բողոքում են, որ դիմորդները բարձր միավորներ են հավաքել՝ 16-17, սակայն չեն ընդունվել, մինչդեռ ավելի ցածր բալ հավաքածներն ընդունվել են:

Դիմորդներից  մեկի հայրը նշել է, որ իր որդին առաջին  հայտով դիմել է իրավաբանության ֆակուլտետ, զուգահեռ  մի քանի հայտերով ևս դիմել է, ստացել է 15.75 միավոր և չի ընդունվել: Նրա խոսքով՝ եղել են դիմորդներ, որոնք 18 և ավելի միավոր են ստացել, 4-5 հայտով դիմել, սակայն դարձյալ չեն ընդունվել:

ԳԹԿ փոխտնօրեն Կարո Նասիբյանը լրագրողների հետ զրույցում օրինակներով պարզաբանել է բարձր բալերով դիմորդների դուրս մնալու պատճառը:

«Եթե մեկն առաջին հայտով գրել է «Իրավագիտություն», մյուսը՝ «Քաղաքագիտություն», իսկ մեկ այլ դիմորդ գրել է «Միջազգային հարաբերություններ», նշանակում է ամեն մեկը մրցում է տվյալ մասնագիտությունն ընտրած դիմորդների հետ: Առաջին հայտն անվճար, թե վճարովի՝ գերակա է մյուսների նկատմամբ»,- նշել է Նասիբյանը և հավելել, որ մինչ այս տարի գերակա են եղել անվճար հայտերը, իսկ մնացած դեպքերում ըստ միավորների ընդունվել են:

Նրա խոսքով՝ այժմ արված է այնպես, որ, օրինակ, միջազգային հարաբերությունների ֆակուլտետ դիմողները կմրցեն իրար հետ:

«Տեղերը փակվեցին, թափուր տեղ կմնա՝ մնացած հայտերը կաշխատեն»,- նշել է Նասիբյանը:

Ըստ ԳԿԹ փոխտնօրենի՝ եթե դիմորդն առաջին հայտով նշել է «Քաղաքագիտություն» և ստացել է 7,5 միավոր և հաղթահարել է անցողիկ շեմը՝ ինքը պետք է ընդունվի, թափուր տեղ չպիտի մնա, իսկ եթե թափուր մնա, ապա լրացուցիչ քննություն կանցկացվի: