ՀՀ կրթության, գիտության, մշակույթի և սպորտի նախարարության «Թարգմանական ծրագրեր և աջակցություն ստեղծագործողներին ու հետազոտողներին» դրամաշնորհային ծրագրի շրջանակում «Լուսաբաց» հրատարակչատունը հրատարակել է Ալեքսանդր Թոփչյանի «Որոգայթը» վեպը:
Հեղինակը գրքի դարձերեսին գրել է. «Հարկ ենք համարում հայտնել, որ այս ստեղծագործությունը ծայրեծայր հորինվածք է, և հնարավոր բոլոր զուգադիպություններն ու նմանությունները եղած ու ներկա որոշակի անձանց, պատմական ինչ-ինչ իրողությունների հետ զուտ պատահականության արդյունք կարող են լինել»:
Գրքում պատմվում է, թե ինչպես մի երկրի ղեկավար բուժվելու պատրվակով խուճապահար փախչում է Եվրոպա՝ երկիրը թողնելով պայթյունավտանգ իրողության մեջ: Նա այլևս չի կարող վերադառնալ իր իսկ տեսքով, և միակ ելքը մնում է պլաստիկ վիրահատությունը: Ուրիշի անվամբ պատսպարվելը նրան հնարավորություն է տալիս անկողմնակալ, կողքի հայացքով գնահատելու իր նախկին արարքները:
Հավելենք, որ Ալեքսանդր Թոփչյանը մահացել է 2021 թ. սեպտեմբերի 3-ին։ Սեպտեմբերի 20-ին մահացել է նրա կինը՝ դերասանուհի, արձակագիր, թարգմանիչ, ՀՀ վաստակավոր արտիստուհի Անահիտ Թոփչյանը։
