ԵՊՀ Գևորգ Արշակյանի անվան ընթերցասրահում այսօր՝ գիրք նվիրելու օրը, մի շարք դպրոցների լավագույն աշակերտներ պարգևատրվեցին գրքերով, տեղեկացնում են բուհի լրատվական ծառայությունից։
Միջոցառմանը, որը կազմակերպել էր ԵՊՀ ՈՒԽ-ն, ներկա էին ԵՊՀ քաղաքացիական դատավարության ամբիոնի վարիչ Վահե Հովհաննիսյանը, Քաղաքական ինստիտուտների և գործընթացների ամբիոնի դոցենտ Մենուա Սողոմոնյանը, ԵՊՀ ՈՒԽ նախագահ Դավիթ Ափոյանը, Փիլիսոփայության և հոգեբանության, Իրավագիտության ֆակուլտետների և ՀՀ ՊՆ Վազգեն Սարգսյանի անվան ռազմական համալսարանի շրջանավարտ, ավագ լեյտենանտ, կամավոր Արցախ մեկնած և պատերազմում զոհված Գևորգ Արշակյանի մայրն ու հարազատները, դպրոցների ուսուցիչներ, աշակերտներ:
Հյուրերին ողջունեց ԵՊՀ շրջանավարտ Աննա Գարեգինյանը՝ նշելով, որ Գևորգն այս անգամ նույնպես բոլորին համախմբել է. «Պատահական չէ, որ մեզ բոլորիս միավորել է Գևորգը՝ իր կրթության, ինքնակրթության, մշտապես առաջ գնալու և պայքարելու կարևորագույն մոտեցումներով: Գևորգը սովորել և ավարտել է գերազանց առաջադիմությամբ՝ մշտապես կարևորելով ինքնակրթության դերը»:
Աննան հիշեց նաև, որ Գևորգն ու նրա «գրադարանի ընկերներից» Դավիթը գրադարանում մնում էին այնքան ժամանակ, մինչև գրադարանի աշխատողները խնդրում էին դուրս գալ՝ ասելով, որ աշխատանքային ժամը վաղուց ավարտվել է:
«Մեր ֆանտաստիկ ընկեր Գևորգ Արշակյանի անվան ընթերցասրահին». ահա այսպես մակագրելով՝ ուսանողներն ու աշակերտները համալրելու են հերոսի անվան ընթերցասրահը:
Գևորգ Արշակյանի ընտանիքի անդամների նախաձեռնությամբ մի շարք դպրոցների աշակերտներ պարգևատրվեցին գրքերով:
Սայաթ-Նովայի անվան երաժշտական դպրոցի սաներից Սամվել Դավթյանը, որը միջոցառման ժամանակ երաժշտական կատարմամբ հիշեց իր ավագ ընկերոջը, նշեց, որ հպարտությամբ է եկել այստեղ. «Հայրենասեր, ազգանվեր, կարեկցող հայի կերպարի լավագույն մարմնացումն էր Գևորգը, որը մեզ՝ իր կրտսեր ընկերներին, համախմբվելու, պայքարելու և մեկ բռունցք դառնալու պատգամը թողեց»:
Comment here
Դուք պետք է մուտք գործեք՝ մեկնաբանությունը ուղարկելու համար։