ԱՄՆ-ի դպրոցներից մեկում ոստիկանը ստիպված գնդակահարել է աշակերտին

Վակեշա քաղաքի (Վիսկոնսին նահանգ, ԱՄՆ, 70 հազար բնակիչ) Հարավային ավագ դպրոցում ոստիկանության սպան կրակել ու վիրավորել է 17-ամյա աշակերտին, տեղեկացնում է Time-ը։

Պատահարը տեղի է ունեցել դեկտեմբերի 2-ին։ Ոստիկանությունը դպրոցից ահազանգ է ստացել, որ աշակերտներից մեկն ատրճանակով է դասի եկել։

Ժամանած ոստիկանները հրահանգել են նրան՝ հանձնել զենքը, որին ի պատասխան 17-ամյա պատանին ատրճանակն ուղղել է ոստիկանների ուղղությամբ։ Ոստիկանության սպան, ըստ լրատվամիջոցի, ստիպված է եղել կրակել նրա վրա։

Վերջինս տեղափոխվել է հիվանդանոց, նրա կյանքին վտանգ չի սպառնում։ Այլ տուժածներ չկան։