Արդեն տեղեկացրել ենք, որ ՀՀ ՆԳՆ ոստիկանության պարեկային ծառայության պարեկները ծառայության ընթացքում հայտնաբերել են կասկածելի 2 քաղաքացու, որոնք Երևանի Մինսկի փողոցում տարօրինակ վարքագիծ են դրսևորել։ Պարեկները մոտեցել են այդ քաղաքացիներին և նկատել են, որ նրանցից մեկը գրպանից իրեր է դուրս հանել ու նետել: Տեղում պարեկները վնասազերծել են նրանց և պարզվել է, որ նետվել են3 փաթեթ և 2 գլանակ: Նշված անձինք թմրանյութ պահելու և օգտագործելու կասկածի առկայության հիմքով պարեկների կողմից ձերբակալվել և տեղափոխվել են ոստիկանության Նոր-Նորքի բաժին: Պարզվում է` բերման ենթարկվածները Վ.Բրյուսովի անվան պետական համալսարանի Աշխատակազմի կառավարման և տնտեսական հարցերով պրոռեկտոր Սահակ Մանուկյանն ու նույն բուհի դասախոս Հակոբ Մադոյանն են: Usanogh.am-ը թեմայի շուրջ զրուցեց Սահակ Մանուկյանի հետ:
-Պարո´ն Մանուկյան, ինչպե՞ս կմեկնաբանեք կատարվածը:
-Այս ամենն արվում է իմ անձը հեղինակազրկելու, ինձ պախարակելու համար: Միայն այդ նպատակն է հետապնդում, այդ նույն ձեռագրով վարվեցին պրոռեկտոր Ցոլակ Ակոպյանի հետ` պաշտոնական լիազորությունների չարաշահման մեջ մեղադրելով: Ուզում են ցույց տալ, թե մենք խուժան ենք, խուլիգան ենք, թմրամոլ ենք, և այլն, և այլն: Ուզում են ցույց տալ, որ բուհերի միավորման, ռեկտորի ապօրինությունների դեմ պայքարողները ահա այսպիսի մարդիկ են: Վերջին շրջանում ես պարբերաբար նամակներ էի հղում ՀՀ վարչապետ Նիկոլ Փաշինյանին, պետական մարմինների, որոնց միջոցով անդրադառնում էի բուհում արվող կոպտագույն խախտումներին:
-Իսկ ձեզ ձերբակալելու դեպքն ի՞նչ հանգամանքներում է տեղի ունեցել:
-Ընկերոջս` Մադոյանի հետ էինք, «Մասիվում» խնդրեցի մեքենան կանգնեցնի, իջանք մի քիչ օդափոխվելու, լավ չէի զգում, մեկ էլ պարեկները մոտեցան, ես հեռու կանգնած էի, մտքովս էլ չէր անցնում, որ կարող են ձերբակալել: Նկատեցի ընկերոջս ձերբակալեցին, իբր թե այն մեղադրանքով, որ նրա մոտ եղել է թմրամիջոց: Ասում եմ` այս ինչ եք անում: Ինձ էլ ձերբակալեցին: Ես պարեկներին ասել եմ` տղանե´ր, ինքս իրավաբան եմ, իմ իրավունքները շատ լավ գիտեմ, այս ի՞նչ եք անում: Ինձ ասում են` դու դեպքի վայրում ես եղել:
-Իսկ ինչպե՞ս եղավ, որ շուտ բաց թողեցին:
-Որովհետև ոչ մի ապացույց չունեին:
-Իսկ դուք չեք պատրաստվու՞մ ձեր իրավունքները պաշտպանել, եթե պնդում եք, որ մեղադրանքը կեղծ է:
-Երբ նախաքննությունը կավարտվի, ես դրանով կզբաղվեմ, պատճառված բարոյական վնասի, բարի համբավս արատավորելու համար փոխհատուցում եմ պահանջելու:
-Բուհում հիմա ի՞նչ մթնոլորտ է:
-Կա լարվածություն ռեկտորի հետ, բայց դա չի անդրադառնում դասապրոցեսի վրա: Ես ինքս երբեք կոնֆլիկտի չեմ գնում:
Նշենք, որ դեպքի փաստով Ավան և Նոր-Նորք վարչական շրջանների քննչական բաժնում նախաձեռնվել է քրեական վարույթ, նշված անձինք ոստիկանության Նոր-Նորքի բաժնից ներկայացվել են Ավան և Նոր-Նորք վարչական շրջանների քննչական բաժին:
ԱՆՆԱ ԲԱԲԱՋԱՆՅԱՆ
