ԳլխավորԼուր

Մեկնարկել է «Կրթություն եվ կարիերա EXPO-2022»-ը

«Yerervan EXPO» ցուցահանդեսային համալիրում բացվեց «Կրթություն և կարիերա EXPO-2022» 21-րդ միջազգային մասնագիտացված ցուցահանդեսը, որին մասնակցում են Հայաստանում և արտերկրում գործող տարբեր կրթօջախներ՝ ներկայացնելով իրենց կրթական ծրագրերը: ԵՊՀ-ն երեք օրերի ընթացքում մշտական ցուցադրությամբ ներկայացնելու է իր 21 ֆակուլտետները, կրթական նոր ծրագրերը, այդ թվում՝ «Ամերիկագիտություն», «Շուկայագիտություն», «Տվյալների գիտությունը բիզնեսում» մագիստրոսական ծրագրերը և «Հասարակայնության հետ կապեր» բակալավրի կրթական ծրագիրը, հայտնում են ԵՊՀ-ից։

Ապրիլի 27-29-ն անցկացվող ցուցահանդեսին ԵՊՀ-ն այս տարի ևս ներկայացավ առանձին տաղավարով: Ցուցահանդեսի նպատակներից է՝ նպաստել կրթօջախների և ձեռնարկությունների միջև գործնական հարաբերությունների հաստատմանը: Ցուցահանդեսի բացման հանդիսավոր արարողությանը, ի թիվս կրթական ոլորտի այլ ներկայացուցիչների, ներկա էր նաև ՀՀ ԿԳՄՍ նախարար Վ. Դումանյանը:

ԵՊՀ մամուլի խոսնակ Ազնիվ Գրիգորյանը կարևորում է նմանօրինակ ցուցահանդեսների անցկացումը. ««Կրթություն և կարիերա EXPO-2022» ամենամյա ցուցահանդեսը չափազանց կարևոր է նախևառաջ կրթական հաստատությունների ունեցած հնարավորությունները ներկայացնելու, ապա՝ համագործակցությունների շրջանակն ընդլայնելու տեսանկյունից: Դեռևս մասնագիտության ընտրության հարցում չկողմնորոշված աշակերները ցուցահանդեսի շնորհիվ կարող են ճիշտ որոշում կայացնել, իսկ մագիստրանտները, ասպիրատները և առհասարակ գիտությամբ հետաքրքրված անձինք հնարավորություն կունենան ուղենշելու իրենց անցնելիք գիտական ճանապարհը: Կրթական հաստատությունների մեկտեղ կենտրոնացմանն ուղղված քայլերը ծառայում են՝ ի շահ մեր պետության»:

ԵՊՀ շրջանավարտների և կարիերայի կենտրոնի փոխտնօրեն Կ. Նազարյանը նշում է. «Կրթությունը ներկայացնելու առումով այսպիսի ցուցահանդեսները չափազանց կարևոր են հատկապես նրա համար, որ աշխատանք է տարվում դիմորդների հետ: Մասնագիտական կղմնորոշման հարցում միայն դպրոցների տված տեղեկատվությունը երբեմն բավարար չի լինում դիմորդների համար: Բացի դրանից՝ ԵՊՀ-ն պարբերաբար նոր կրթական ծրագրեր է ներդրում, որոնց մասին իրազեկելու հարցում էլ ավելի է մեծանում էքսպոների դերը»:

Բացի նրանից, որ ԵՊՀ-ն ներկայանում է թեմատիկ ցուցադրություններով, որոնց շրջանակում տրամադրվում է բուհի կրթական գործունեության վերաբերյալ հետաքրքիր տեղեկատվություն, համալսարանի ուսանողները տեղում կազմակերպում են նաև տարբեր գիտափորձեր: Այսօր գիտափորձեր էին անցկացնում կենսաբանության ֆակուլտետի մագիստրանտները. «Մենք մեր առաջարկած մեթոդով լուծում ենք 2 գլոբալ խնդիր. վերամշակում ենք թափոնները և զբաղվում նաև կնսապարարտանյութի առաջացմամբ: Ներկայումս մեր խնդիրն աշակերտներին ավելի ներգրավելն է կենսաբանության ոլորտում, և աշակերտները մեծ սիրով մասնակցում են փորձերին»,- նշում է ԵՊՀ մագիստրանտ Հայարփի Աղեկյանը:

Ysu.am-ի հետ զրույցում Անտոն Քոչինյանի անվան գյուղատնտեսական քոլեջի ուսանող Զոյա Մարգարյանն ասում է. «Քոլեջում սովորում եմ տնտեսագիտության բաժնում: Ինձ ավելի շատ հետաքրքրում է հենց տնտեսագիտության ֆակուլտետը. ապագա հաշվապահ եմ, և կրթությունս ցանկանում եմ շարունակել ԵՊՀ-ում: Այս ցուցահանդեսի ժամանակ, կարելի է ասել, ստացա իմ բոլոր հարցերի պատասխանները»:

Գիտական փորձերի նախաձեռնությամբ վաղը հանդես կգան քիմիայի ֆակուլտետի ուսանողները, իսկ վերջին օրը՝ ֆիզիկայի ֆակուլտետի ուսանողները:

Հավելենք, որ «Կրթություն և կարիերա EXPO-2022»-ին ԵՊՀ-ի մասնակցության կազմակերպչական աշխատանքները կատարել են ԵՊՀ հանրային կապերի և մաքեթինգի վարչությունը և ԵՊՀ շրջանավարտների և կարիերայի կենտրոնը: