Հայ-ռուսական (Սլավոնական) համալսարանում գոյություն ունի «5-րդ շարասյուն», որտեղ ներգրավված անձիք փորձում են օգնել ռուսական կողմին` օրեր առաջ տեղի ունեցած ռեկտորի ընրության արդյունքները չեղարկելու հարցում. այս մասին Usanogh.am-ին հայտնում են բուհին մոտ կանգնած աղբյուրները:
Ավելի վաղ հայտնել էինք, որ ՀՌՀ-ի պրոֆեսորադասախոսական, վարչական կազմերից և ուսանողներից ընտրված պատվիրակները փակ գաղտնի քվեարկությամբ (216 կողմ և 147 դեմ ձայների հարաբերակցությամբ) ռեկտորի պաշտոնում ընտրել են պրոֆեսոր Էդվարդ Սանդոյանին։
Usanogh.am-ը տեղեկացրել էր նաև, որ ռուսական կողմը չի ճանաչել Հայ-ռուսական համալսարանի ռեկտորի ընտրությունները: Ռուսաստանի կրթության և գիտության փոխնախարար Կոնստանտին Մոգիլևսկու նամակում նշված է, որ մայիսի 12-ին տեղի ունեցած ընտրությունները չեն կարող լեգիտիմ ճանաչվել բազմաթիվ ընթացակարգային խախտումների պատճառով: Խախտումները, ըստ Մոգիլևսկու, մասնավորապես, վերաբերում են թեկնածուների կողմից նախընտրական ծրագրի ներկայացման ժամկետներին։
Մեր աղբյուրների փոխանցմամբ, սակայն ընտրությունների լեգիտիմության խնդիր, առհասարակ չկա, քանի որ դրանք անցկացվել են ընթացակարգային բոլոր պահանջներին համապատասխան , ավելին` հաշվարկին ներկա են եղել 5 դիտորդներ, որոնք որևէ խախտում չեն արձանագրել, ընտրություններին ներկա է եղել նաև ՀՀ ԿԳՄՍՆ ներկայացուցիչը, որը հետևել է ողջ գործընթացին և անձամբ շնորհավորել է ընտրված ռեկտորին:
Մեր աղբյուրները հայտնում են, որ ռուսական կողմը մտադիր է ժամանակավոր պաշտոնակատար նշանակել մինչև նոր համաձայնագրի կնքումը (Մոգիլևսկին ավելի վաղ նշել էր, որ Հայ-ռուսական համալսարանի ղեկավարության փոփոխության համար անհրաժեշտ է թարմացնել Ռուս-հայկական միջկառավարական համաձայնագիրը). «Բուհում այդ 5-րդ շարասյան ներկայացուցիչների շրջանում պատերի տակ փսփսոց կա…Բոլոր խոսակցությունները հասնում են ռուսական կողմին: Բայց, չնայած ռուսական կողմի նկրտումներին, Հայաստանի ԿԳՄՍ նախարարությունը կոշտ դիմադրություն է ցույց տալիս, ավելին` մոտ օրերս կլինի նորընտիր ռեկտորի հաստատման հրամանը»: